Toqaev óziniń bul úndeýi elimizdegi árbir jastyń júregine jetetinine senim bildirdi.
Memleket basshysy Qasym-Jomart Toqaev Abaı oblysyna jumys sapary barysynda óskeleń urpaqty bilimge, ǵylymǵa qushtar bolýǵa shaqyrdy, dep habarlaıdy Almaty-akshamy.kz Aqordaǵa silteme jasap.
«Bir sózben aıtqanda, eńbekqorlyq – qazirgi zamanda bizge asa qajet qundylyq. Osy qaǵıdany keńinen dáripteýimiz kerek. Meniń muny Semeı tórinde turyp aıtýymnyń ózindik sebebi bar. Óıtkeni, bul – árdaıym jas urpaqty jaqsylyqqa, jańashyldyqqa jetelegen jer», - dedi prezıdent.
Toqaev óziniń bul úndeýi elimizdegi árbir jastyń júregine jetetinine senim bildirdi.
«Shyn máninde, qazir – bilim men ǵylym saltanat qurǵan zaman. Muny dáleldeýdiń esh qajeti joq. Álemdik ekonomıkada joǵary tehnologıalyq ónimderdi jasap shyǵaratyn kompanıalar alǵa shyqty. Bul – ǵylym keleshektiń bet-beınesin anyqtaıdy degen sóz», - dedi ol.
Memleket basshysynyń pikirinshe, tyń ıdeıa men ozyq oı kez kelgen salany órkendetedi.
«Óskeleń urpaq bilimge, ǵylymǵa qushtar bolýy kerek. Osyny jan-jaqty dáripteýge memleket qana emes, búkil qoǵam jáne árbir azamat atsalysýǵa tıis. Órkenıetti memleketti tek bilimdi azamattar ǵana qalyptastyra alady», - dedi Qasym-Jomart Toqaev.
Prezıdent jýyrda AQSH-ta jumys istep júrgen jastarmen kezdeskenin, olar bilim alýǵa degen ynta-jigeri men eńbekqorlyǵynyń arqasynda álemniń ár túkpirinde tabysqa jetkenin atap ótti. Ol osyndaı jastardy úlgi tutýǵa shaqyrdy.