Prezıdent Qasym-Jomart Toqaev Sherhan Murtaza atyndaǵy Halyqaralyq Taraz ınovasıalyq ınstıtýtynyń Stýdentter úıinde oqý ornynyń oqytýshylarymen jáne stýdenttermen kezdesti, dep habarlaıdy Almaty-akshamy.kz. Aqordaǵa silteme jasap.
Instıtýt rektory Erbolat Saýryqov oqý ornynyń maman daıarlaý isindegi jetistikteri men aldaǵy damý josparyn tanystyrdy. 2019 jyly burynǵy «Taraz» qonaq úıi rekonstrýksıalandy, qaıta jasaqtalǵan jataqhanada 500 stýdentke barlyq jaǵdaı jasalǵan.
Qasym-Jomart Toqaev memlekettiń bilim salasyna aıryqsha mán berip otyrǵanyn atap ótip, búginde bilim alamyn degen adamǵa múmkindik mol ekenin aıtty.
– Elimizdiń bolashaǵy – jastar. Jańa býyn, jańa tolqyn ósip keledi. Bilim alý óte mańyzdy. Abaısha aıtqanda, «tolyq adam» degenimiz – oıy ushqyr, zerek, bilimge qushtar adam. Ár nársede qanaǵat bolýy kerek. Biraq bilimge kelgende, qanaǵat bolmaýy kerek. Árdaıym izdený kerek. Elimizdiń bolashaqta damyp, kórkeıgen elge aınalýy, aldymen, sizderge baılanysty. Biz sizderge senemiz, úlken úmit artamyz. Barshańyzǵa sáttilik tileımin! – dedi Memleket basshysy.
Sonymen qatar, Memleket basshysy Baızaq aýdanynda jańadan ashylǵan Kóktal orta mektebine de bardy
Mektep materıaldyq-tehnıkalyq jaǵynan tolyq jabdyqtalǵan: 32 oqý kabıneti, 4 kompúter kabıneti, 2 lıngofon kabıneti, robototehnıka kabıneti, sport zaly, sheberhana, kitaphana, medısınalyq pýnkti jáne asqanasy bar. Mektepte mańaıdaǵy aýyldardan qatynap oqıtyn balalar úshin kólik tasymaly uıymdastyrylǵan. 2023-2025 jyldary «Jaıly mektep» ulttyq jobasy aıasynda Jambyl oblysynda 9500 oryndyq 13 mektep salý josparlanyp otyr. Onyń segizi kelesi jyly paıdalanýǵa berilýi tıis. Jalpy, Prezıdenttiń tapsyrmasymen 2023-2025 jyldary «Jaıly mektep» ulttyq jobasy aıasynda respýblıka boıynsha 800 myń oqýshyǵa arnalǵan 400-den astam mektep salynady.
