Ulybrıtanıa Qazaqstanda júrgizilip jatqan saıası reformalardy oń baǵalaıdy
Kezdesý barysynda saıası, saýda-ekonomıkalyq, ınvestısıalyq jáne gýmanıtarlyq salalardaǵy ekijaqty yntymaqtastyqty odan ári nyǵaıtý perspektıvalary talqylandy, dep habarlaıdy Almaty-akshamy.kz Aqordanyń resmı saıtyna silteme jasap.
Memleket basshysy Ulybrıtanıa mınıstrine iltıpat bildire otyryp, eki el arasyndaǵy yntymaqtastyqty odan ári nyǵaıtý úshin onyń búgingi saparynyń máni zor jáne óńirlik aýqymdaǵy mańyzdy oqıǵa ekenine nazar aýdardy.
«Sizdiń saparyńyz Qazaqstan men Ulybrıtanıa arasyndaǵy ózara yntymaqtastyqty odan ári nyǵaıtýǵa tyń serpin beredi. Men Sizdiń jaqynda Syrtqy ister mınıstrliginde sóılegen sózińizdi tyńdadym. Onda Ulybrıtanıanyń syrtqy saıasattaǵy uzaq merzimdi ustanymy qamtyldy jáne shyn máninde, óte mańyzdy máseleler aıtyldy», – dedi Memleket basshysy.
Qasym-Jomart Toqaev ekijaqty qatynastardyń qarqyndy damyp kele jatqanyn atap ótti.
«Bizdiń yntymaqtastyǵymyz, ásirese, ekonomıka jáne saıası salalarda óte tabysty dep baǵa bergim keledi. Ózara baılanystarymyzdyń oń baǵytyn odan ári ilgeriletý úshin qosymsha kúsh-jiger jumsaýymyz kerek», – dedi Prezıdent.
Áńgimelesý barysynda Prezıdent Qasym-Jomart Toqaev Premer-mınıstr Rıshı Sýnaqqa sálemi men izgi tilegin joldady. Sondaı-aq Ulybrıtanıa Úkimetiniń basshysyn elimizge ózine yńǵaıly kez kelgen ýaqytta saparmen kelýge shaqyrdy. Bul sapar ekijaqty qatynastardy nyǵaıtýǵa baǵyttalǵan birqatar naqty máseleni talqylaýǵa jaqsy múmkindik beretinin atap ótti.
Óz kezeginde Djeıms Kleverlı Astana men London arasyndaǵy qarym-qatynastardyń qarqyndy damyp kele jatqanyn jetkizdi. Onyń aıtýynsha, Ulybrıtanıa Qazaqstanda júrgizilip jatqan saıası reformalardy oń baǵalaıdy.
«Sizdiń elińiz – aımaqtaǵy bizdiń negizgi saýda seriktesimiz. Ekonomıkalyq ósimge baǵyttalǵan jospardy júzege asyrý maqsatynda birlesip jumys isteý úshin jaqsy múmkindik bar ekenin kórip otyrmyz. Qazaqstanda júzege asyrylyp jatqan salyq salasyndaǵy reformalar baǵdarlamasy ózara tıimdi ekonomıkalyq qatynastardy nyǵaıtýǵa yqpal etedi dep oılaımyn», – dedi Ulybrıtanıa mınıstri.
Sonymen qatar kezdesý barysynda Qasym-Jomart Toqaev pen Djeıms Kleverlı óńirlik jáne halyqaralyq kún tártibindegi ózekti máseleler jóninde pikir almasty.