Prezıdent Japonıa Premer-mınıstriniń arnaýly keńesshisi, Parlament Ókilder palatasynyń depýtaty Akıhısa Nagashımany qabyldady, dep habarlaıdy aqshamnews.kz Aqordaǵa silteme jasap.
«Qazaqstan Japonıamen strategıalyq seriktestikti damytýǵa erekshe mán beredi. Eki el arasynda dostyq pen ózara túsinistikke negizdelgen tyǵyz yntymaqtastyq ornaǵan. Biz «Qazaqstan men Japonıanyń arasy alys bolǵanymen, dostyǵymyz berik» dep aıtamyz, – dedi Memleket basshysy.
Qasym-Jomart Toqaev memleketter arasyndaǵy saýda-ekonomıkalyq, ınvestısıalyq jáne ǵylymı-tehnıkalyq baılanystardy keńeıtýge aıtarlyqtaı áleýet bar ekenine toqtaldy. Prezıdent Qazaqstan ekonomıkasyna tartylǵan japon ınvestısıasynyń kólemi 8 mıllıard dollardan asqanyn aıtty. Sondaı-aq elimizdiń sheteldik ınvestorlarǵa, sonyń ishinde Japonıanyń ozyq kompanıalaryna qolaıly jaǵdaı jasaýǵa daıyn ekenin atap ótti.