Qasym-Jomart Toqaev Klımattyń ózgerýi jónindegi BUU-nyń negizdemelik konvensıasy taraptarynyń 28-shi konferensıasy aıasynda ACWA Power kompanıasy dırektorlar keńesiniń tóraǵasy Muhammed Abýnaııanmen kezdesti.
Kezdesý barysynda kompanıanyń Qazaqstanmen ózara yqpaldastyǵyn odan ári nyǵaıtýdyń negizgi aspektileri jáne birqatar ınvestısıalyq jobany júzege asyrý máseleleri talqylandy, dep habarlaıdy Almaty-akshamy.kz Aqordanyń resmı saıtyna silteme jasap.
Sondaı-aq Jetisý oblysynda qýaty 1 GVt bolatyn jel elektr stansıasyn salý perspektıvalary qarastyryldy. Bul nysanǵa 1,8 mıllıard dollar kóleminde ınvestısıa quıý kózdelip otyr.
Muhammed Abýnaııan kompanıanyń Qazaqstandaǵy úlesin keńeıtýge jáne jasyl energetıka sektorynda ınvestısıalyq jobalardy júzege asyrýǵa múddeli ekenin aıtty.
Qasym-Jomart Toqaevtyń pikirinshe, bul bastama Qazaqstannyń jańartylatyn energıa kózderin damytýdyń óńirlik ortalyǵy bolý nıetine saı keledi.
Memleket basshysy kompanıanyń qyzmeti men aýqymdy jobalaryn, atap aıtqanda, quny 4,6 mıllıard dollar bolatyn Dýbaıdaǵy «Noor Energy 1» kún elektr stansıasynyń qurylysyn joǵary baǵalady. Bul álemdegi eń iri nysan sanalady.