Keshe depýtat Maqsat Tolyqbaıdyń Qarasaı aýdanyndaǵy mekteptiń jeke qolǵa ótip ketkeni týraly másele kótergenin habarlaǵanbyz.
Jýrnalıs Dıas Nuraqyn mektepti qaı ákim satyp jibergeni týraly qujattardy jarıalady, dep habarlaıdy Almaty-akshamy.kz
Almaty oblysy Qarasaı aýdany, Shalqar aýylyndaǵy Lomonosov atyndaǵy 250 orynǵa arnalǵan, jalpy aýdany 1585 sharshy metr bolatyn ǵımarat 15 mln 224 myń teńgege satylǵan.
«Almaty oblysyndaǵy 15 mıllıon teńgege satylǵan mektepti kim satqany, kimniń satyp alǵany bárińizge qyzyq shyǵar, ıá? Onda tómendegi qujattarǵa úńilip kórińiz. Aýmaǵy 75 sotyq, jalpy aýdany 1585 sharshy metr bolatyn dańǵaradaı ǵımarat rasymen nebári 15 mln 224 myń teńgege satylypty. Satyp alýshynyń armany joq shyǵar. Mynadaı aqshaǵa taýyq qora turǵyza almaısyń ǵoı myna zamanda. Aýdan ákimi satylsyn degen qaýly shyǵaryp bergen eken. Bilim bóliminiń basshylary komısıa quramynda bolypty. Maqsat Tolyqbaı kótergen máseleni tereńdep qazsań, talaı dókeıdiń arty ashylaıyn dep tur. Eki aıdyń ishinde mektep memleket menshigine ótedi dep senemin!» - dep jazdy Dıas Nuraqyn óziniń Fb paraqshasynda.
Jýrnalıs jarıalaǵan qujattarda tólemshiniń aty-jóni Sherhan Álibekuly dep kórsetiledi. Memlekettik nysandy Qarasaı turǵyn úı qurylysy degen kompanıa satyp alǵan. Sherhan Álibekuly degen azamattyń JSN-yna qaraǵanda, ol - 1998 jyly týǵan azamat.
«Qarasaı turǵyn úı qurylysy JSHS-nyń teńgeriminde turǵan Qarasaı aýdany, Shalqar aýyly, Abaı kóshesi, 9 úı mekenjaıynda bos turǵan ǵımaratty jáne alańy 0,7500 ga bolatyn jer ýchaskesin satý máselesi zańda belgilengen tártipke sáıkes satylýǵa kelisilsin», - delingen Qarasaı aýdany ákimi mindetin atqarýshy J.Tájıev shyǵarǵan 2018 jylǵy qaýlyda.
Qaýlynyń júzege asyrylýyna ákimniń orynbasary N.Satýbekov degen sheneýnik jaýapty bolǵan.
Ǵımaratty kásipkerge ótkizip berýge kelisken jáne qabyldaǵan komısıanyń quramynda Qarasaı aýdany bilim bóliminiń basshysy G.T. Takımova, osy bólimniń bas esepshisi G.S. Shalapanova men Qarasaı turǵyn úı qurylysy kompanıasynyń dırektory B.B. Baltabekov bolǵan.