Búgingi Úkimet otyrysynda Premer-mınıstr Álıhan Smaıylov keshe Petropavl qalasyndaǵy №4-mektepte oryn alǵan oqys oqıǵaǵa baılanysty İshki ister mınıstrligi ókiliniń esebin tyńdady.
Úkimet basshysy bul óte qaýipti jaǵdaıdyń el ishinde úlken alańdaýshylyq týdyrǵanyn atap ótti, dep habarlaıdy Almaty-akshamy.kz Elorda.info saıtyna silteme jasap.
«Balalardyń qaýipsizdigine alańdamaıtyn otbasy joq. Endi mekteptiń ishinde de qaýip bar ekenine kýá bolyp otyrmyz», - degen ol jaýapty vedomstvo basshylaryna birqatar tapsyrmalar berdi.
Atap aıtqanda, bul máseleni qaıta zerdelep, oqý oryndaryna tekserý júrgizý qajettigine toqtaldy.
«Beınebaqylaý kameralarynyń sanyn kóbeıtip, mektepke kireberis jerlerde baqylaýdy kúsheıtý máselesin qaraý kerek. Oqý-aǵartý mınıstrligi İshki ister jáne Tótenshe jaǵdaılar mınıstrligimen birlesip, «Qaýipsizdik sabaqtaryn» ázirleýi qajet. Balalar ártúrli jaǵdaıda ózderin qalaı ustaýy kerektigin naqty bilýi tıis», - dedi Á.Smaıylov.