Kúzden bastap oqýshylar mektepte durys tamaqtanatyn bolady, dep habarlaıdy aqshamnews.kz
Qantty 3,6 esege, tuzdy tutyný 5 esege deıin azaıtylady.
1 qyrkúıekten bastap mektepterde tamaqtanýdyń jańa standarty engiziledi. Bul týraly Densaýlyq saqtaý mınıstri Aqmaral Álnazarova Úkimet otyrysynda aıtty.
"2025 jylǵy 1 qyrkúıekten bastap bilim berý uıymdarynda durys tamaqtaný boıynsha halyqaralyq usynymdarǵa sáıkes ázirlengen tamaqtanýdyń jańa standarty jáne kóp nusqaly úlgilik perspektıvalyq mázir qoldanysqa engiziledi. Tamaqtanýdyń jańa standarty durys tamaqtanýǵa baǵyttalǵan, atap aıtqanda semizdik, qant dıabeti, júrek-qan tamyrlary jáne basqa aýrýlardyń damý qaýpin azaıtý maqsatynda qantty 3,6 esege, tuzdy 5 esege deıin azaıtýdy kózdeıdi. Bul norma ınfeksıalyq emes aýrýlardy, atap aıtqanda, balalardaǵy semizdikti 15%-ǵa deıin, qant dıabetin 20%-ǵa deıin, arterıalyq gıpertenzıany 18%-ǵa deıin jáne basqa da sozylmaly aýrýlardy 15%-ǵa deıin azaıtýǵa yqpal etedi", - dedi mınıstr Úkimette jasaǵan baıandamasynda.
Tamaqtaný standartynda as bloktary joq shaǵyn jınaqtalǵan mektepter úshin mázir kózdelgen, alǵash ret mektep taǵamdaryna qanaǵattaný deńgeıin baǵalaýǵa múmkindik beretin jeýge jaramsyzdyq ındeksi (tárelkedegi tamaq qaldyqtary) uǵymy engizilgen.
Aqmaral Álnazarovanyń aıtýynsha, tamaqtanýdyń jańa standarty bilim berý obektileri men mektepke deıingi balalar obektilerine qoldanylady.
"Tamaqtaný standartyn engizý maqsatynda qazirgi ýaqytta Bilim jáne densaýlyq saqtaý basqarmalarynyń, mektep ákimshilikteri men tamaq ónim berýshileriniń qatysýymen oqytý semınarlary ótkizilýde", - dedi DSM basshysy.