«Aıtylǵan sózdiń maǵynasyn basyńa is túskende túsinesiń» degen támsildiń tórkinin endi túsinip jatqandaımyn. Mektep qabyrǵasynda júrgenimde «Ustazdyń qadirin, mekteptiń qadirin qazir túsinbeısińder. Mektepti bitirgennen keıin ǵana túsinesińder» degen sózdi ustazdarymyz jıi aıtýshy edi. Degenmen, onyń shyn maǵynasyn túsinbegen ekenmin. Eger maǵynasyn túsingenimde mekteptegi árbir saǵattyń qadirin erterek biler edim, ustazdardyń aıtqanyn janashyrlyq dep qabyldar edim. Biraq biz olaı etpedik... Nege? Sebebi bizge aıtylǵan aqyl-keńes pen ǵıbrattyń maǵynasyn der kezinde túsinbeppiz.
Mine, ómiri bitpeıtindeı kóringen sabaq ta bitti. Bizge janashyrlyq tanytyp, bilim úıretip jatqan ustazdardy kórmeımiz. Onyń ústine mektepke de kúnde barmaımyz. Ózgeni qaıdam, ózim birtúrli bir nárse jetpeı turǵandaı kúı keshýdemin. Ne jetpeıdi dep oılanyp qarasam, sol bizge myń-san aıtylǵan «mekteptiń qadirin bitirgende bilesiń» degen sózdiń maǵynasy sıaqty. Sol sózdiń mánin endi túsingendeı boldym. Biraq, nárse ol– zýlap ótip ketken on bir jyl.
Qazaqtyń uly oıshyly Abaı Qunanbaıuly: «Adam ata-anadan týǵanda esti bolmaıdy: estip, kórip, ustap, tatyp, eskerip baryp esti bolady» deıdi.
Sózdiń túp maǵynasyn maǵynasyn der kezinde, tym bolmasa jartylaı bolsa da túsiný úshin ne isteýimiz kerek? Daryndy bolyp týý kerek pa, álde asa aqyldy bolý qajet pa? Múmkin onyń oqýy da bar shyǵar? Nege bizge mektepte osyny úıretpedi eken?
Shirkin! Sózdiń túp maǵynasyn birden túsindirip beretin oqý bolsa, qazir bárin tastap sony úırener edim. Sonda ómirdiń artynan qýyp júrmeı, ár kezeńde ár nárseniń maǵynasy men qadirin der kezinde bilip, durys ómir súretin edik. Múmkin, bolashaqta sony oqytyp-úıretetin muǵalim bolsam, adamǵa, qoǵamǵa paıdam tıetin maman bolar edim!