Darhan Satybaldy Almaly aýdanyndaǵy káriz júıeleriniń qurylysyna jaýapty merdigerge merzim men sapany qatań saqtaý jóninde talap qoıdy, - dep habarlaıdy aqshamnews.kz.
Almaty ákimi Darhan Satybaldy jumys sapary barysynda Almaly aýdanyndaǵy Týrkebaev kóshesinde Kishi Abaı kóshesinen Qarasaı batyr kóshesine deıingi aralyqta júrgizilip jatqan káriz jelileriniń qurylysy barysymen tanysty.
Jobaǵa aýdan ákimdigi tapsyrys bergen. 15 shaqyrym ınjenerlik jeliler tartylyp, shamamen 1 700 abonent, ıaǵnı 6 800-den asa turǵyn káriz júıesine qosylmaq. 2024 jyly bul jumys ishinara aıaqtalyp, alty kóshede 5 shaqyrymǵa jýyq jeli tartyldy. 2025 jyly uzyndyǵy 10 shaqyrym bolatyn 15 kóshede qurylys josparlanǵan. Qazir sol kóshelerdiń 10-ynda jumys bastalyp ketti.
Qala basshysy merdiger uıymǵa barlyq jumysty 1 qyrkúıekke deıin aıaqtaýdy tapsyrdy.
«Sizderden sapa men merzimdi talap etemiz. Kepildik merzimi – 5 jyl. Eger qandaı da bir apat bolsa, sizder qalpyna keltiresizder», – dedi Darhan Satybaldy.
Jobanyń negizgi maqsaty turǵyndardyń turmys sapasyn jaqsartý jáne aýdannyń ınjenerlik ınfraqurylymyn jańǵyrtý.
Sonymen qatar jumys sapary aıasynda Almaty ákimi kúrdeli jóndeý júrgizilip jatqan №3 qalalyq emhana ǵımaratyna bardy. Búginde ishki ınjenerlik júıeler, lınearly panelderden qaptalǵan qasbetti ornatý, bólmearalyq qabyrǵa jasaý, ishki árleý, kafel tóseý, esik-tereze ornatý men aýlany kórkeıtý jumystary aıaqtaldy. Qazir nysan 95% daıyn.