2019 jyly mundaı naýqastardyń sany 10 myń adamdy qurasa, 2024 jyldyń ortasyna qaraı bul kórsetkish 29,2 myń bolǵan, dep habarlaıdy aqshamnews.kz
Olardyń basym bóligi – áıelder, erler sany – nebary 102 adam. Finprom málimetinshe, jalpy alǵanda, Qazaqstan halqy arasyndaǵy bedeýliktiń taralýy jahandyq kórsetkishtermen shamalas: bala kóterý máselesi 16–17% jupta kezdesedi. Sońǵy 30 jyl ishinde Qazaqstanda 140 myńnan astam jup ekstrakorporaldyq uryqtandyrý (EKO) ádisterimen emdelgen. Nátıjesinde 39 myń bala dúnıege kelgen.
Pasıentter sanynyń ósýi «Ańsaǵan sábı» memlekettik baǵdarlamasynyń júzege asýymen baılanysty. Bul baǵdarlama ekstrakorporaldyq uryqtandyrý (EKO) úshin shamamen 7 myń kvota usynady. Zańǵa sáıkes, osy qymbat prosedýrany búdjet esebinen alý úshin áıelder men erler bedeýlik dıagnozyn rastap, esepke turýy qajet.
Halyq sany kóp megapolıster men oblystarda dıagnoz qoıylyp, esepke alynǵandar sany kóbirek. Bul – sol óńirlerde dıagnostıkadan ótkender sanynyń da joǵary ekenin kórsetedi. Kósh basynda Almaty qalasy tur: munda ótken jyldyń ortasyna deıin «bedeýlik» dıagnozymen 4,2 myń pasıent tirkelgen. Ekinshi orynda – Astana (2,6 myń adam), úshinshi orynda – Jambyl oblysy, onda osyndaı reprodýktıvti máseleleri bar 2,5 myń qazaqstandyq esepte tur.