12 mamyrdan bastap bes jasqa deıingi balalary bar ata-analar «Keleshek» júıesi aıasynda Otbasy bankinde AQYL bilim berý jınaq salymyn asha alady.
Elimizdegi mektep jasyna deıingi balalar sany 2 mıllıonnan asady, bul halyqtyń 10 paıyzy. Olardyń bilim alýyna qoldaý kórsetý maqsatynda «Keleshek» júıesi engizildi. Bul júıe otbasylarǵa balalardyń oqýyna qarjy jınaýǵa múmkindik beredi.
Energyprom málimetinshe, «Keleshek» júıesi bes jastan bastap balalardy qamtı otyryp, memlekettik bastapqy bilim berý kapıtalyn, jyl saıynǵy memlekettik syıaqyny jáne ınvestısıalyq tabysty qarastyrady. Baǵdarlamanyń seriktesteri retinde myna bankter kórsetilgen: Otbasy banki, Halyk Bank, Jusan Bank, Nurbank, VTB Banki; sondaı-aq myna saqtandyrý kompanıalary: «Evrazıa» saqtandyrý kompanıasy, Freedom Finance Life ómirdi saqtandyrý kompanıasy, «Halyk-Life», Standard Life, jáne Nomad Life.
Bul shotqa memleket tarapynan bastapqy kapıtal aýdarylady – 60 AEK (235 920 teńge), al ata-ana qamqorlyǵynsyz qalǵan balalar úshin – 120 AEK (471 840 teńge). Eger bala 2025 jyldyń basyna deıin bes jastan asqan bolsa, bastapqy kapıtal qarastyrylmaıdy. Mańyzdy eskertý: «Keleshek» boıynsha jınalǵan qarajatty «Ulttyq qor – balalarǵa» jobasyndaǵy qarjymen biriktirýge bolady.
Baǵdarlama 5 jastan bastap 18 jasqa deıingi kezeńde balalardyń atyna qarjy jınaýdy turaqty túrde júrgizýge arnalǵan. Jınalǵan qarajatty el ishinde de, shetelde de bilim alýǵa – joǵary, tehnıkalyq jáne kásiptik bilimge – paıdalanýǵa bolady.
Memleketten bastapqy kapıtal: bıyl 5 jasqa tolǵan balalarǵa – 60 AEK (235 920 teńge); ata-ana qamqorlyǵynsyz qalǵan balalarǵa – 120 AEK (471 840 teńge); ekinshi deńgeıli banktiń syıaqysy nemese ómirdi saqtandyrý kompanıasynyń ınvestısıalyq tabysy; jyl saıyn 5–7% mólsherinde memlekettik syıaqy tólenedi. Shot ashylǵannan keıin ata-analar balalar úshin jyl saıynǵy eń tómengi jarnany engizýi kerek: SÝSN balalary úshin – 12 AEK (aıyna shamamen 4 myń teńge), qalǵan balalar úshin – 24 AEK.