Qazaq ulttyq qyzdar pedagogıkalyq ýnıversıteti álemdik bedelge ıe Times Higher Education Impact Rankings 2025 jahandyq reıtıńine úshinshi jyl qatarynan endi.
Bul reıtıń – joǵary oqý oryndarynyń Birikken Ulttar Uıymynyń 17 Turaqty damý maqsatyna qosqan úlesin baǵalaıtyn mańyzdy kórsetkish, dep habarlaıdy aqshamnews.kz.
Ýnıversıtettiń bul tizimge enýi – bilim berý, ǵylymı-zertteý jáne áleýmettik jaýapkershilik salalaryndaǵy jetistikteriniń halyqaralyq deńgeıde moıyndalǵanynyń aıǵaǵy.
2025 jylǵy reıtıńke álemniń 2526 joǵary oqý orny qatysyp, ýnıversıtetter arasyndaǵy básekelestik aıtarlyqtaı artty (salystyrý úshin: 2024 jyly – 1963 JOO). Ýnıversıtetter arasyndaǵy básekelestik kúsheıgenine qaramastan, QyzPU 1501+ deńgeıindegi ornyn saqtap qaldy. Bul — oqý ornynyń uzaqmerzimdi strategıalyq damý josparynyń tıimdiligin jáne turaqtylyqqa baǵyttalǵan qadamdarynyń nátıjeliligin aıǵaqtaıdy.
Ýnıversıtet BUU-nyń barlyq 17 Turaqty damý maqsaty boıynsha baǵalanyp, kelesi nátıjelerge qol jetkizdi: kedeılikti joıý – 1001+ oryn, ashtyqty joıý – 801+ oryn, jaqsy densaýlyq pen ál-aýqat – 1001–1500 oryn, sapaly bilim berý – 1001–1500 oryn, genderlik teńdik – 301–400 oryn, taza sý jáne sanıtarıa – 801–1000 oryn, qymbat emes jáne taza energıa – 1001+ oryn, laıyqty jumys jáne ekonomıkalyq ósý – 1001+ oryn, ındýstrıalandyrý, ınovasıalar jáne ınfraqurylym – 1001+ oryn, teńsizdikti azaıtý – 801–1000 oryn, turaqty qalalar jáne eldi mekender – 801–1000 oryn, jaýapty tutyný jáne óndiris – 801+ oryn, klımattyń ózgerýimen kúres – 1001+ oryn, teńiz ekojúıelerin saqtaý – 601+ oryn, qurlyqtaǵy tirshilik – 601–800 oryn, beıbitshilik, ádildik jáne tıimdi ınstıtýttar – 1001+ oryn, turaqty damý úshin seriktestik – 1501+ oryn.
QyzPU turaqty damý salasyndaǵy bastamalardy júzege asyrýda jáne áleýmettik ádilettilik pen ekologıalyq turaqtylyqty ilgeriletýde belsendi jumys júrgizip keledi. Ýnıversıtettiń ǵylymı-zertteý qyzmeti men bilim berý baǵdarlamalary osy mańyzdy baǵyttardy qamtı otyryp, qoǵamnyń ornyqty damýyna mańyzdy úles qosýda.
Aıta keteıik, Times Higher Education Impact Rankings – joǵary oqý oryndarynyń jahandyq deńgeıde TDM-ǵa qol jetkizýge qosqan úlesin keshendi túrde baǵalaıtyn halyqaralyq reıtıń. Qazaq ulttyq qyzdar pedagogıkalyq ýnıversıtetiniń atalmysh reıtıńke enýi – ýnıversıtet ujymynyń eren eńbeginiń jarqyn kórinisi.
