Mekteptegi ózin-ózi basqarý:  úzdik saılaý júıesi

Almatydaǵy «Alem» ınovasıalyq shyǵarmashylyq ortalyǵynda «Mekteptegi ózin-ózi basqarýdyń úzdik saılaý júıesi» İİ qalalyq baıqaýy uıymdastyryldy.

 Baıqaý Almaty qalasy máslıhaty men qalalyq Bilim basqarmasynyń qoldaýymen ótkizildi. Dúnıejúzilik saılaý kúnin mereke­leý aıasynda ótken «Mekteptegi ózin-ózi basqa­rýdyń úzdik saılaý júıesi» İİ qalalyq baıqaýy mektep oqýshylarynyń demokratıalyq pro­sesterge qatysýyn yntalandyrýǵa, sondaı-aq ózin-ózi basqarý daǵdylaryn damytýǵa baǵyt­talǵan.

Maqsat – ózin-ózi basqarý júıesi eń tıimdi jumys isteıtin mektepti anyqtaý. Sondaı-aq, oqýshylardyń Qazaqstan Respýblıkasynyń saılaý zańnamasy men saılaý júıesiniń erek­shelikteri boıynsha quqyqtyq saýattylyǵyn jáne habardarlyǵyn arttyrý.

Ádilqazylar alqasy – Almaty qalasy aý­maqtyq saılaý komısıasynyń tóraǵasy Aı­gúl Orazqyzy, «Alatau Aqparat» medıahol­dınginiń Bas dırektory Erjan Qalymbaıuly, Almaty qalasy Qoǵamdyq keńesi múshesi Beknur Qısyqov, Qazaqstan Respýblıkasy Prezıdentiniń janyndaǵy Memlekettik bas­qarý akademıasynyń Almaty qalasy boıyn­sha fılıalynyń dırektory Aınur Maratqy­zy, máslıhat depýtaty Asqar Qýandyquly, «Almaty amanaty» daryndy balalar men ta­lantty jastardy anyqtaý jáne qoldaý ortaly­ǵynyń ádiskeri Anar Toılybaeva, Saılaý jú­ıesiniń ardageri Quralaı Kúmisbaeva.

2025 jylǵy 21–30 qańtar aralyǵynda Almaty qalasynyń mektepterinen baıqaýǵa qatysý úshin 160 ótinim berildi, bul jalpy mektepter sanynyń 74,4%-yn quraıdy (bar­lyǵy 215 mektep). Baıqaýǵa 143 mektep jumys usyndy (ótinimderdiń 89,4%-y), al baıqaýǵa 127 mektep qatysty (ótinimderdiń 79,4%-y). Ár aýdannyń baıqaý jumystary kórsetilip, ujymdyq óner kórsetý, qorytyndylaý jáne jeńimpazdardy dıplomdarmen jáne baǵaly syılyqtarmen marapattaý sharalary uıymdas­tyryldy. Barlyǵy 127 mekteptiń 835 ózin-ózi basqarý ókili qatysty, bul ótken jylmen sa­lystyrǵanda, 23 mektepke kóp. 31 qańtarda baıqaýdyń aýdandyq kezeńderi ótti.

Baıqaýdyń aqtyq kezeńine aýdandyq kezeń­derden jeńimpaz bolǵan 8 mektep ótti. Dálirek, «Alataý aýdany: №204 jalpy bilim beretin mektep», «Almaly aýdany: №96 jalpy bilim beretin mektep», «Áýezov aýdany: №175 «Jańa ǵasyr» gımnazıasy», «Bostandyq aýdany: №105 O.Jandosov atyndaǵy gımnazıa», «Jetisý aýdany: №102 jalpy bilim beretin mektep», «Medeý aýdany: Sh.Ýálıhanov atyn­daǵy №12 mamandandyrylǵan gımnazıa», «Naýryzbaı aýdany: №200 mektep-gımnazıa», «Túrksib aýdany: №59 mektep-gımnazıa».

Baıqaý joǵary dárejede ótti. Mekteptegi ózin-ózi basqarýdyń eń tıimdi saılaý júıesi bar mektepter anyqtaldy.

BAIQAÝ JEŃİMPAZDARY:

1-oryn – «№200 mektep-gımnazıa» KMM;

2-oryn – «Jańa ǵasyr №175 gımna­zıa» KMM; 

3-oryn – «№102 jalpy bilim beretin mektep» KMM.

Beknur KISIKOV, Almaty qalasy Qoǵamdyq keńesiniń múshesi:

Otanshyldyq,  patrıottyq sezimge  tárbıeleıdi 

Mundaı baıqaýlardyń mán-ma­ńyzy joǵary. Bul jas órenderdi otanshyldyq, patrıottyq sezimge tárbıeleıdi. Sondaı-aq, oqýshylar mektepten bastap bolashaq qoǵamdyq ómirge belsene aralasýǵa daǵdylanady. Halyq­tyń qalaýlysy bolý ekiniń biriniń qolynan kele bermeıtin is. Son­dyqtan el ıgiligi jolynda ja­lyndy jastardyń bilimi, kúsh- jigeri qajet.