Telefonnyń kesirinen balalardyń oqýǵa degen yntasy tómendep ketken.
Mamandar gadjetterdiń oqýshylardyń densaýlyǵy, psıhıkalyq jaǵdaıy men uıqysyna da keri áseri baryn aıtady, dep habarlaıdy aqshamnews.kz.
Fransıada mektep aýmaǵynda gadjetter qoldanýǵa bolmaıdy
Fransıada 2018 jyldan beri mektep aýmaǵynda gadjetterdi qoldanýǵa bolmaıdy. Endi bıylǵy jańa oqý jylynan bastap olardy ustaýǵa da ruqsat joq. Oqýshylar telefon, «aqyldy» saǵat pen planshetterdi bilim berý mekemesine kirgende birden shkafqa salyp ketý kerek. Bul – pılottyq joba. Ázirge 200 mektepte engizilgen. Joba tıimdiligin kórsetse, keler jyldyń basynan barlyǵy da tıisti talapqa baǵynatyn bolady.
Grekıada oqýshylar telefonyn sómkesinen shyǵarmaý kerek
Al Grekıada bıylǵy oqý jylynan bastap balalar telefondaryn sómkesinen shyǵarmaý kerek. Erejege baǵynbaǵandar bir kúnge sabaqtan shettetiledi. Bul jergilikti bilim berý mınıstrliginiń kıberbýllıngpen kúres saıasatynyń bir bóligi. Bıyl kóktemde munda synyptastaryn sýretke ne vıdeoǵa túsirip, ony mazaq etip ınternetke salǵany úshin oqýshyny mektepten shyǵarý týraly ereje kúshine engen.
AQSH-tyń 14 shtatynda mektepte telefon qoldanýǵa bolmaıdy
AQSH-tyń 14 shtatynda mektepte telefon qoldanýǵa qatysty shekteý bar. Jaqynda Kalıfornıa gýbernatory da mektepterde smartfondardy qoldanýǵa tyıym salatyn zańǵa qol qoıdy. Oǵan 6 mln oqýshy baǵynady. Kalıfornıadan bólek, AQSH-tyń taǵy 13 shtatynda gadjetterdi qoldaný boıynsha shekteýler bar. Bılik: «Degenmen, bul oqý prosesinde balalar múlde sıfrlyq qurylǵylardy qoldanbaıdy degen sóz emes», - deıdi. Shekteý tek telefondarǵa qatysty.