Mektepte qazaq tiliniń gramatıkasy qaıta oqytylatyn boldy. Bul týraly Bilim jáne ǵylym mınıstri Asqat Aımaǵambetov óziniń feısbýk jelisindegi paraqshasynda jarıalady, dep habarlaıdy almaty-akshamy.kz
2016 jyldan bastap elimizdegi mektepter jańartylǵan bilim mazmunyna kóshti. Sáıkesinshe, ár synyptyń oqý baǵdarlamalary, oqýlyqtary jańara bastady. Osy jańashyldyq aıasynda tipti oqýshylardy baǵalaý júıesi ózgerip, dástúrli 5-tik júıesiniń ornyna krıterııli baǵalaý engizildi. Birneshe jańa pánder de oqytyla bastady.
Ata-analar, muǵalimder men qoǵam tarapynan bul bastama ártúrli qabyldandy. Biraq til janashyrlarynyń basty muńy qazaq tiliniń gramatıkasyna qatysty boldy. Gramatıkany oqýǵa bólinetin saǵat sany azaıyp, onyń ornyna tildik daǵdylardy damytýǵa kóńil bólingen. Bul máseleni qazaq tiliniń mamandary jıi kóterip, baǵdarlamaǵa ózgeris kerektigin aıtqan edi. Búgin elimizdiń bas ustazy osy máselege qatysty mınıstrliktiń ustanymyn jetkizdi.
Mınıstrdiń aıtýynsha, jýyrda orta bilimdegi qazaq tili pánin oqytý baǵdarlamasy birshama ózgermek.
«Aldaǵy ýaqytta gramatıkany oqytýǵa bólinetin saǵat sany artady. Oqýshynyń durys jazýy men sóıleýi úshin, oıyn tıanaqty jáne saýatty jetkizýdegi gramatıkanyń orny erekshe», - deıdi Asqat Aımaǵambetov
Asqat Qanatuly gramatıkany oqytýda lıngvıs ǵalym Ahmet Baıtursynulynyń eńbekteri basshylyqqa alynatyndyǵyn da jetkizdi.
Aıta keteıik, bıyl jańartylǵan bilim berý mazmunyna 11-synyptar da kóshti. Olar úshin jańadan oqýlyqtar jaryq kórdi. Demek, bıylǵy mektep túlekteri Ulttyq biryńǵaı testileýdi jańa baǵdarlama boıynsha tapsyrady.