Oqý-aǵartý mınıstri Asqat Aımaǵambetov dırektormen qosa mekteptiń basqa qyzmetkerleriniń de aýysýyna tosqaýyl qoıý kerek, dep habarlaıdy Almaty-akshamy.kz QazAqparatqa silteme jasap.
«Rotasıa ótkizgen kezde, dırektormen qosa orynbasarlarynyń, esepshisiniń, basqa qyzmetkerlerdiń birge aýysýyna tosqaýyl qoıý kerek. Bul jaıynda aıttyq. Baqylaý departamentteri tıisti qadaǵalaýǵa alsyn. Bul rotasıany bárin bir mektepten ekinshi mektepke kóship barýy úshin istep jatqan joqpyz. Osy máselege baqylaý júrgizý kerek. Jalpy, barlyq jumys zań aıasynda iske asýy tıis. Keıbir óńirde «myna mektepke barǵym keledi, mynaǵan barǵym kelmeıdi» deıtinderdi estip jatyrmyn. Muny toqtatý kerek. Eger «rotasıany túsinbeımiz, qabyldamaımyz» dese, ondaı kisilermen eńbekshartyn tipti toqtatý qajet», - dedi mınıstr vedomstvonyń apparat jınalysynda.
Asqat Aımaǵambetov rotasıa óte mańyzdy tetik ekendigin basa aıtty.
«Biraq, eki máselege nazar aýdarý qajet. Birinshiden, rotasıa júrgizgen kezde orynbasarlaryn, esepshilerin ózimen birge alyp júrmeý, ekinshiden, obektıvti kózqaraspen, zańnamaǵa saı aýystyrý qajet. Bul jerde ártúrli táýekelderge jol berilmeýi tıis. Zań buzýshylyqtar bolsa, der kezinde sheshim qabyldaýymyz kerek», - dedi ol.
Buǵan deıin habarlaǵanymyzdaı, osy jyldyń 1 tamyzyna deıin 317 balabaqsha meńgerýshisi men 383 mektep dırektory aýysady.