Áleýmettik jelide óziniń mektep bitirý keshine jınaǵan aqshasyn dzúdodan jarysqa jumsap, Azıa kýboginde Qazaqstan namysyn qorǵaǵan bozbalanyń oqıǵasy kópshiliktiń júregin jylytty. Aqshamnews.kz tilshisi jas sportshymen tildesip, oqıǵa jaıly tereńirek bildi.
Sán-saltanatty keshten bas tartyp, el namysyn qorǵaýǵa Tashkenttegi jarysqa attanǵan balanyń esimi - Erasyl Bolatbek. Almaty qalasy, №5 mektep-gımnazıasynyń túlegi. Dzúdomen 10 jasynan beri aınalysady. Jelide taraǵan vıdeony Erasyldyń jattyqtyrýshysy jarıalaǵan.
"Sheshimim úshin esh ókinbeımin"
Erasyl otbasynyń tuńǵyshy. Ózinen keıin inisi men eki qaryndasy bar. Sportqa qyzyǵýshylyǵy ata-anasynyń baǵyt berýimen oıanǵan. Ol "mektep bitirý keshine jumsaısyń" dep bergen ata-anasynyń aqshasyn jarysqa jumsap jibergenine esh ókinbeıtinin aıtty. Ol Tashkentte ótken Azıa kýboginde qol júlde ıelengen.
"Bul sportqa ata-anamnyń jol silteýimen bet burǵan edim. Qazir bul meniń ómirlik jolyma aınaldy. Mektep bitirý keshine arnalǵan aqshany ata-anam bergen. Ony jarysqa barýǵa jumsadym. Bul men úshin mańyzdyraq boldy. Solaısha qola júlde ıelendim. Bul sheshimime esh ókinbeımin", – deıdi jas sportshy.
17 jastaǵy Erasyldyń jetistikteri de az emes. Ol 2023 jyly Óskemende ótken Qazaqstan chempıonatynyń qola júldegeri, 2025 jyly Oralda ótken Qazaqstan chempıonatynyń jeńimpazy, Tashkentte ótken Azıa kýboginiń qola júldegeri.
"Maqsatym - Olımpıada chempıony bolý"
Qazir Erasyl Grýzıada tájirıbe almasýǵa baǵyttalǵan oqý-jattyǵý jıynyna qatysyp jatyr. Jas sportshynyń basty maqsaty – Olımpıadaǵa qatysyp, el namysyn abyroımen qorǵaý.
"Sportty sońyna deıin qýyp, Olımpıada chempıony bolǵym keledi. Al bos ýaqytta serýendegendi, jańa elderge saıahattaǵandy, tájirıbe jınaýdy jaqsy kóremin", – deıdi Erasyl.
Jurt júldege kórimdik jibergen
Kópshiliktiń erekshe yqylasyna bólengen Erasyl áleýmettik jelide tarap ketken vıdeodan keıin el qoldaýyn aıqyn sezingen. Biraq eshkimnen kómek suramaǵanyn aıtady.
"Men eshqandaı qarjylaı kómek suraǵan joqpyn. Biraq adamdar ózderi kórimdik dep bank kartama aqsha aýdaryp, tilekterin bildirip jatty. Bul men úshin úlken qoldaý", – deıdi sportshy.
Aıta keteıik, mektep bitirý keshine arnalǵan qarjyny Erasylǵa ata-anasy bergen. Alaıda ol bul keshke barmaıtynyn aldyn ala bilgen.
"Mektep bitirý keshine báribir qatysa almaımyn. Sebebi dál sol ýaqytta ulttyq quramada oqý-jattyǵý jıyny ótedi. Aqsha máselesinen emes, sport men úshin birinshi orynda", – deıdi ol.