«Balaǵa laıyq» sharasy.
BǴM Balalardyń quqyqtaryn qorǵaý komıtetiniń bastamasymen mektep dárethanalary men asqanalaryna monıtorıń júrgizý boıynsha «Balaǵa laıyq» respýblıkalyq aksıasy bastaldy, dep habarlaıdy Almaty-akshamy.kz Turkystan.kz silteme jasap.
«Mektepti jaqsartýǵa kómektes!» uranymen ótkiziletin atalmysh aksıa oqýshylardy sapaly teńdestirilgen tamaqpen, qoljetimdi ári jyly, taza jáne qaýipsiz dárethanalarmen qamtamasyz etýge baǵyttalǵan.
Aksıaǵa mektep oqýshylary, eriktiler, balalar ókildigi, muǵalimder, ata-analar, úkimettik emes uıymdardyń ókilderi jáne t.b. qatysa alady.
«Buǵan deıin mınıstrlik birqatar oblystardyń ákimdikterine mektep dárethanalary men mektep as máziriniń jaǵdaıyn jaqsartý sharalaryn qabyldaý qajettigi týraly hattar joldaǵan bolatyn. Biz bul máseleni baqylaýda ustap otyrmyz jáne aksıany ótkizý balalardyń mekteptegi jaǵdaılary tıisti deńgeıde jasalmaǵan bilim berý uıymdaryn anyqtaýǵa kómektesedi. Monıtorıń bireýdi jazalaý úshin emes, balalarǵa qajetti jaǵdaı jasaýǵa mektepterdi tartý úshin júrgiziledi. Mektep ákimshiligine olqylyqtardy joıýǵa ýaqyt beriledi. Sonymen qatar, mektep asqanalary men dárethanalaryndaǵy sanıtarlyq talaptardyń buzylǵany týraly habarlaǵandardyń aty-jónin jasyrýǵa kepildik beriledi», – dep atap ótti Balalardyń quqyqtaryn qorǵaý komıteti tóraǵasynyń orynbasary Elına Paýlı.
Naýqannyń sharttary boıynsha, birinshi kezeń «Check your school» («Mektebińdi tekser») dep atalady. Qatysýǵa nıet bildirgender fotolar men beınejazbalardy WhatsApp pen Telegram-ǵa 87006990446 nómirine, sondaı-aq, Telegram botyna https://t.me/Balagakz_bot siltemesi arqyly jibere alady. Qalaǵandar #BalagaLayik #balagalaiyq heshtegi arqyly Instagram jáne Tiktok áleýmettik jelileri arqyly dárethanalar men asqanalardyń fotolary men vıdeolaryn jibere alady.
Jiberilgen materıaldardy arnaıy jumys toby qarap, aýdandyq bilim berý basqarmalaryna olqylyqtardy túzetý úshin jiberedi. Jumys nátıjesi áleýmettik jelide jarıalanatyn bolady.