Ǵ. Dáýkeev atyndaǵy Almaty energetıka jáne baılanys ýnıversıtetinde ýnıversıtet ujymy men stýdentter arasynda saraptamalyq talqylaý ótti. İs-sharanyń maqsaty – atom elektr stansıasynyń (AES) qajettigi, onyń halyqqa tıimdiligi, ekologıalyq qaýipsizdigi, mamandardy daıyndaý isi, energıa qurylysyna qajetti jabdyqtar, ýran qory jáne basqa da tıimdi jaqtary týraly pikir almasý boldy. Bul týraly sala mamandary óz oılaryn ortaǵa saldy.
Kezdesý barysynda qatysýshylar Qazaqstanda AES salý týraly ótken referendýmnyń aldyn ala qorytyndylaryn talqylady. Jınalǵandardyń pikirinshe, AES salý – Qazaqstannyń energetıkalyq qaýipsizdigin arttyrýdaǵy mańyzdy qadam jáne eldiń ekonomıkalyq damýyna serpin beredi. Sala mamandarynyń aıtýynsha, Qazaqstan ýran qory boıynsha álemde aldyńǵy oryndarda tur jáne bul elimizge atom energetıkasyn damytý úshin úlken artyqshylyq beredi.
Atom salasynyń sarapshysy Baýyrjan Ibraev AES qurylysynyń elge tıgizetin ekonomıkalyq jáne áleýmettik tıimdilikterin atap ótti:
«Atom elektr stansıasyn salýdan qoryqpaýymyz kerek. Álemde bar tájirıbeni elimiz de qoldanbaq. AES-nyń arqasynda eldimekender damıdy, jańa jumys oryndary ashylady. Eger AES qurylysynda 1 ınjener jumys istese, onyń janynda 10 kómekshi qajet bolady. Demek, kadr tapshylyǵy bolmaıdy dep oılaımyn. Energetıka salasynda mamandar jetkilikti. Bul – qaýipsiz joba, ekologıalyq turǵydan da qaýipsiz. Eshqandaı ózen-kólder qurǵatylmaıdy, sondyqtan alańdaýǵa negiz joq. Atom energetıkasy – kómir men munaıǵa qaraǵanda ekologıalyq taza energıa kózi, bul Qazaqstannyń jasyl ekonomıkaǵa kóshý strategıasyna saı keledi», – dedi ol.
Ibraev AES salý kezinde tehnologıalyq qaýipsizdik sharalarynyń qatań saqtalatynyn, jobadaǵy qaýipsizdik deńgeıiniń joǵary ekenin de atap ótti.
«Biz álemdegi eń ozyq tehnologıalardy qoldaný arqyly qaýipsizdikti qamtamasyz etemiz. Bul joba arqyly elimizdegi energetıkalyq tapshylyqty sheship qana qoımaı, kórshi elderge de elektr energıasyn eksporttaý múmkindigi týady. Bolashaqta birneshe elektr óndiretin ortalyqtar salý qajettigi de baıqalyp otyr, óıtkeni elimizdiń ekonomıkasy men halqynyń suranysy artyp keledi», – dedi ol.
Kezdesý barysynda stýdentter men ýnıversıtet ujymy AES qurylysy jónindegi óz suraqtaryn qoıyp, salanyń jetekshi mamandary jaýap berdi. Sala mamandary Qazaqstanda qaýipsizdiktiń eń joǵary standarttary qamtamasyz etiletinin jáne qurylys barysynda halyqaralyq tájirıbe men qatań normalarǵa súıenetinin túsindirdi.