MSQ Basqarma tóraǵasy Sábıt Ahmetov Almaty qalasyna jumys sapary barysynda jergilikti medısına qaýymdastyǵymen jıyn ótkizdi.
Onda syzyqtyq shkalany qoldaný, medısınalyq qyzmetterdiń keıbir túrlerine tarıftiń tómendigi syndy ózekti máseleler talqylandy,dep habarlaıdy Almaty-akshamy.kz.
Kóptegen medısınalyq uıymdy qarjylandyrý máselesi alańdatady. Medısınalyq kómek kólemi ótken jyldardaǵy tutyný kólemine sáıkes josparlanady. Sondyqtan pandemıa kezinde kovıdtik stasıonar retinde jumys istegen keıbir aýrýhanalarda negizgi profılder boıynsha em alǵandar sany tómen bolǵandyqtan qarjy kólemi de soǵan saı bólingen. Al Qor basshysy qarjy kereýet sanyna emes, bólingen búdjet pen kórsetilgen medısınalyq qyzmet kólemine jasalǵan analız negizinde bólinetinin atap ótti. Sondyqtan Óńirlik komısıa basqasha sheshim qabyldaı almaıdy, dep túsindirdi ol.
Sábıt Ahmetov medısınalyq uıymdardyń tájirıbesin zerdeleı kele, ýákiletti organdardy qulaqtandyrý arqyly sheshýge bolatyn birneshe máseleni túrtip aldy. Olardyń ishinde polıjaraqat jáne jalpy medısınalyq qyzmettiń negizgi túrlerine tólenetin tarıfterdi kóterý, stasıonarlarda emdeý barysynda jumsalatyn naqty shyǵyndardy qosý, kredıtorlyq bereshekti tómendetý úshin shyǵystardy ońtaılandyrý joldaryn qarastyrý syndy máseleler bar. Ol mindetter arasynda medısınalyq kómektiń jekelegen túrlerin qarjylandyrý máselesine analız jasaý qajettigin atap ótti.
«Ár óńirdiń ózindik erekshelikteri bar. Biraq qordalanǵan máseleler barlyq jerde birdeı. Eń basty másele – medısınalyq kómektiń keıbir túrleri men profılderi boıynsha tólenetin tarıftiń tómendigi. Jedel járdem stansıalaryna belgilengen tarıf olardyń shyǵyndaryn jabýǵa múmkindik bermeıdi. Ekinshi másele – stasıonarlardaǵydaı syzyqtyq shkalany qoldanýdy bastapqy medısınalyq-sanıtarlyq kómek kórsetetin uıymdarǵa, atap aıtqanda konsýltatıvtik-dıagnostıkalyq qyzmetterge engizý. Buryn kólemder kelisimshart qosymshasyna saı aı saıyn bólinetin, biraq biz jyldyq kólemdi baqylap keldik. Endi jospardyń aı saıyn saqtalyp otyrǵanyn kórip otyrmyz, artyq tutynylǵan qyzmetterdi kesip tastaımyz. Úshinshi másele – medısına uıymdarynyń kredıtorlyq bereshegi. Bereshektiń týyndaýynyń birneshe sebebi bar. Úkimettiń №1193 Qaýlysy sheńberinde jyl saıyn jalaqy ósedi. Salkdarynan shyǵynnyń 80%-ǵa jýyǵy eńbekaqyǵa jumsalyp, qarjy tapshylyǵyna ákep soqtyrýda. Dári-dármek, shyǵyn materıaldary men komýnaldyq qyzmet baǵasynyń ósýi de qosymsha bolyp otyr. Jasyratyny joq, búdjetti tıimsiz paıdalaný saldarynan kredıtorlyq bereshek paıda bolǵan jaǵdaılar da joq emes. Mysaly, birneshe aıǵa dári-dármek qoryn alatyn kezde MÁMS aqshasy esebinen mıllıard teńgege kúrdeli tehnıka satyp alyp, shtatty orynsyz keńeıtý faktileri de oryn alǵan», – dep sózin túıindedi Sábıt Ahmetov.
Qor tóraǵasy aldaǵy josparlardy da ortaǵa saldy. Buryn medısına qyzmetkerleri aqparattyq júıelerge qyzmet durys engizilmegen jaǵdaıda týyndaıtyn túrli qıyndyqtardy aıtyp shaǵymdanatyn. Mysaly, balalar arasyndaǵy turaqty profılaktıkalyq tekserýlerdi alaıyq. Tekserý nátıjesi aqparattyq júıede balanyń týǵan kúnine qaraı engiziledi, ıaǵnı bala belgili bir jasqa tolmaıynsha tekserý qorytyndysyn engizý múmkin emes. Nátıjesinde medıkter bul aqparatty 4-5 aıdan soń salýy múmkin. Al balanyń ata-anasy balanyń qabyldaýda bolmaǵanyn alǵa tartyp, muny jalǵan jazbaǵa teńeıdi. Osyndaı ótinishter negizinde Qor saraptama júrgizip, aqparattyq júıedegi osyǵan uqsas olqylyqtardy anyqtady.
«Biz qazir Densaýlyq saqtaý mınıstrligimen birlesip TMKKK jáne MÁMS paketteriniń ara-jigin ajyratý máselesimen aınalysyp jatyrmyz. Mysaly, keıde pasıent kelgende dertine qaraı bir kod qoıylady. Al, emdeý barysynda aýrý kody ózgerip ketedi. Endeshe, qarjylandyrý kózi de ózgeredi degen sóz. Esterińizde bolsa, jyldyń basynda Joǵary aýdıtorlyq palatanyń nusqaýymen qarjylandyrý kózin qorytyndy dıagnoz boıynsha belgilep, qarjyny jzappaı kesý bastaldy. Pasıent medısına uıymyna MÁMS arqyly emdeletin aýrýmen tússe, operasıa jasalǵan soń, TMKKK pakertine aýysyp ketedi. Aqparat ózgergesin, oǵan qarajat qarastyrylmaıdy jáne bul soma kesiledi. Osydan keıin biz keıbir stasıonarlardyń pasıentterdi, ásirese shuǵyl jaǵdaıdaǵy naýqastardy aýrýhanaǵa jatqyzýdy toqtatyp tastaǵanyn kórdik. Sondyqtan Joǵary aýdıtorlyq palatamen kelissózder júrgizildi. Sáýir aıynan bastap qarjylandyrý kózin qaıta anyqtaý toqtatyldy. Sondaı-aq biryńǵaı pýl quryp, qarjylandyrý kózine qaramastan kelisimsharttardy biriktirý baǵytynda jumys júrgizip jatyrmyz. Bul dárigerlerge túsetin júktemeni azaıtyp, ýaqytty únemdeý úshin qajet», – dedi Qor basshysy.
Óz kezeginde qala ákiminiń orynbasary Ásem Núsipova shahardyń densaýlyq saqtaý salasynyń damýy jáne medısınalyq uıymdardaǵy jóndeý jumystary, jabdyqtar satyp alý baǵytynda atqarylyp jatqan jumystarǵa toqtaldy.
Sapar qorytyndysy boıynsha Sábıt Ahmetov Almaty qalasynyń medısınalyq uıymdary qoldanyp otyrǵan menedjmentti basqa óńirler de meńgerýge tıis ekenin atap ótti. Almatyda pasıentter sany tym kóp, halyq óz quqyǵyn jaqsy biledi, soǵan saı talap ta qoıa biledi, klınıkalar arasynda báseke de bar. Soǵan qaramastan Almaty klınıkalary pasıentterinen aıyrylyp qalmaýǵa kúsh salady ári kredıtorlyq bereshektiń ósýine jol bermeý joldaryn da umymdy paıdalanyp otyr, dedi Qor basshysy.