Kandıdat Saraıshyq aýylynyń dárigerlerimen kezdesti
Qazaqstan Respýblıkasynyń Prezıdenttigine kandıdat Jıgýlı Daırabaevtyń úgit-nasıhat jumystary Atyraý oblysynda jalǵasty. Kandıdat Saraıshyq aýylynyń dárigerlerimen kezdesti. Kezdesýde aýyldyq eldimekenderdegi medısınalyq qyzmettiń sapasy jaıly aıtyldy, dep habarlaıdy Almaty-akshamy.kz.
Búgingi aýyldardaǵy ınfraqurylymdyń ózekti problemalardyń biri – medısınalyq saqtandyrýmen qamtamasyz etý. Aýyl turǵyndarynyń turaqty jumysy bolmaǵandyqtan medısınalyq saqtandyrý qoryna túsetin túsimderi joq. Sol sebepti memleket tarapynan kórsetiletin medısınalyq kómek aýyldyqtarǵa arman.
«Qazir medısınalyq saqtandyrýyń bolmasa eshkimge kereksizsiń. Osy olqylyqtyń ornyn toltyrý úshin aýyldyqtardy turaqty jumyspen qamtamasyz etý kerek. Búgingi jaǵdaıda bul múmkin emes. Biraq tyǵyryqtan shyǵýdyń basqa joly bar. Ol –jeke úı sharýashylyǵy kooperasıasyn qurý. Bir JÚSH-te eń kemi eki adam – eri men áıeli jumys isteıdi, ıaǵnı ózin-ózi qamtamasyz etedi. Olar óndirgen aýylsharýashylyǵy ónimin kooperatıvke ótkizse kooperatıv olardan salyqty ustap qalýǵa mindetti. Salyqtyń bir bóligi tórtinshi deńgeıdegi búdjetti, ıaǵnı sol aýyldyń Ákiminiń búdjetin qalyptastyrýǵa, bir bóligin aýyldyqtardyń Zeınetaqy qoryndaǵy, áleýmettik saqtandyrý jáne medısınalyq saqtandyrý Qoryndaǵy jınaqtaý shotyna aýdarýǵa bolady. Bul úı sharýashylyǵynda jumys isteıtin azamattardy medısınalyq qyzmetpen qamtamasyz etýge kómek bolady. Eger sheneýnikter aýylda turaqty jumys ornyn qurýmen nemese aýyl kooperasıasyn yntalandyrýmen aınalysqysy kelmes, onda aýyl turǵyndaryn medısınalyq saqtandyrý talabyn tipten alyp tastaǵa týra keledi. Aýyldyqtarǵa barlyq medısınalyq qyzmet memleket esebinen tegin kórsetilýi tıis», – dedi kandıdat.
Budan keıin kandıdat aýyl muǵalimderimen kezdesti. Onda ol dala demokratıasynyń ustanymdary jaıly aıtyp, olarmen birge ar-ojdandy, tárbıeli urpaq ósirý máselesin talqylady. Bilim berý ádistemesin ózgertýdiń qanshalyqty ózekti ekenin tilge tıek etti.
«Tárbıe talbesikten bastalady. Al talbesiktiń tórkini aýylda. Kishige – izet, úlkenge – qurmet tárizdi adamı qasıettiń bári aǵa býynnyń áńgimesinen alynady. Mádenıet osydan bastalady. Joǵary deńgeıdegi mádenıetti qalyptastyratyn osy aýyl mektepteri. Sondyqtan muǵalimderdiń sabaq berý ádisiniń, tárbıe jumysynyń mańyzy zor», – dedi J. Daırabaev.