Qazaqstan Respýblıkasynyń Prezıdenttigine kandıdat Jıgýlı Daırabaevtyń úgit-nasıhat jumystary Atyraý oblysynda jalǵasty, dep habarlaıdy Almaty-akshamy.kz.
Sapar barysynda kandıdat Atyraý qalasy mańyndaǵy Mahambet aýdanyna qarasty jol boıynda salynyp jatqan jylyjaılardyń qurylys jumysymen tanysty. Atalǵan keshen 5,6 gektar aýmaqta zamanaýı tehnologıaǵa sáıkes salynyp jatyr. Jylyjaı jospar boıynsha paıdalanýǵa 2023 jyldyń kókteminde berilip, Atyraý qalasy turǵyndaryn qyzanaqpen qamtamasyz etetin bolady. Keshende jańbyrlatyp sýarý júıesi qarastyrylǵan. Kandıdattyń pikirinshe jaýyn-shashyn sırek túsetin, kún shýaǵy mol mundaı óńirge jylyjaılar óte qajet. Úkimet mundaı sharýashylyqtarǵa jol salý, sý, elektr jelilerin tartyp berý sıaqty barynsha qoldaý kórsetýi tıis. Jalpy quny 8 mlrd turatyn joba qarjysynyń bir bóligi bankiden alynǵanyn estigen kandıdat edáýir qynjylys bildirdi.
«Báıterek» holdıńi, Agrarlyq nesıe korporasıa sıaqty kvazımemlekettik qarjy ınstıtýttary turǵanda sharýalar nelikten bankke júginedi? Bul elimizde agrarlyq saıasattyń durys jolǵa qoıylmaǵanyn kórsetse kerek. Qojalyqtar qolǵa alǵan jobalarynyń boıyna qan júgirtetin qarajat tabýdyń sheshimi osyndaı bolǵandyqtan buǵan da kónýge májbúr», – dedi J. Daırabaev.
Kandıdat jylyjaıdan keıin halyqty birneshe jyldan beri eshki sútimen qamtamasyz etip otyrǵan sharýashylyq – Mahambet aýdanynyń Saraıshyq aýylyndaǵy zamanaýı eshki fermasyna bardy. Fermany qurýshy –
Qazaqstannyń Eńbek Eri – Rozymetov Vladımır Fedorovıch. Ol sharýashylyqty 10-15 jyl buryn satyp alyp, qaıta qurylymdap, búginde úlken keshenge aınaldyryp otyr.
«Bul eńbek adamynyń nátıjeli jumysynyń arqasy. Oǵan memlekettik joǵary marapattyń berilýi eńbek adamynyń baǵalanýy. Osyndaı adamdardyń tókken teri memleket tarapynan eskerilip, qurmettelip otyrsa halyqtyń aýyl sharýashylyǵyna, agrobızneske degen yntasy artady», – dedi kandıdat.
Eshki fermasy zamanaýı tehnologıa arqasynda joǵary ónimdilikke qol jetkizgen. Desek te, munda mal azyǵynyń bazasy jutań. Jaıyq ózeninde burynǵydaı mol sý joq. Ol jyl ótken saıyn tartylýda. Sý jetkiliksiz.
«Máseleni túbegeıli sheshpeı is alǵa baspaıdy. Bir átteńi, qazir Qazaqstanda sý mamandary tipten qalmaǵan. Jaýapty vedomstvalardy isteıtin mamandardyń sý salasynda tájirıbesi joq. Bul óndiristiń qyr-syryn bilmeıdi. Sondyqtan transshekaralyq sýlar boıynsha kelissózder júrgizgende kóbine utylyp jatady. Osy olqylyqtyń ornyn toltyrý qajet. Atyraý óńirinde Jaıyqtan bólek jerasty sý mol. Ony geologıalyq zertteýler rastap otyr. Osy jerasty sýlaryn durys paıdalanýdy qolǵa alý kerek», – dedi J. Daırabaev.
Oblys turǵyndary kandıdattyń bastamalary men saılaýaldy baǵdarlamasyn tyńdady.