Qazaqstanda QR–kod arqyly kórsetilgen medısınalyq qyzmetti rastaý boıynsha pılottyq joba iske qosyldy
QR Densaýlyq saqtaý mınıstrligi Qazaqstan Respýblıkasynyń sıfrlyq damý, ınovasıalar jáne aeroǵarysh ónerkásibi mınıstrligimen birlesip pasıenttiń QR-kod arqyly medısınalyq qyzmet alý faktisin rastaý jónindegi pılottyq jobany iske qosty.
Pılottyq jobaǵa Astana, Almaty qalalarynyń jáne Soltústik Qazaqstan oblysynyń medısınalyq uıymdary qatysady.
Dárigerge barý faktisin rastaý úshin qoldanylatyn QR rastaýy pasıent pen densaýlyq saqtaý mamanynyń arasyndaǵy sıfrlyq ózara is-qımyldy ornatý sheńberinde qaýipsizdik pen ashyqtyqty qamtamasyz etedi.
Pasıent emhanaǵa egov mobile mobıldik qosymshasynyń kómegimen kelip, dárigerdiń kabınetinde usynylǵan QR-kodty skanerleıdi jáne onyń kelgenin rastaıdy.
Sondaı-aq QR-kod arqyly pasıent qajetti aqparatpen - emhananyń ataýymen, medısınalyq aqparattyq júıeniń ataýymen tanysa alady, dárigerge barǵan kúni men ýaqytyn, dárigerdiń tegi men atyn, medısınalyq qyzmet kórsetýge óziniń kelisimin jáne derbes derekterdi jınaýǵa jáne óńdeýge kelisimin kóre alady.
Azamattyń medısınalyq qyzmetti alý faktisin rastaýdyń sıfrlyq quraly medısınalyq kómek kórsetýdiń ashyqtyǵyn qamtamasyz etýge, pasıenttiń qanaǵattanýshylyǵyn baǵalaýǵa jáne eń bastysy, pasıent dárigerge is júzinde barmaǵan kezde medısınalyq aqparattyq júıelerdegi «tirkeýlerdi» alyp tastaýǵa múmkindik beredi.
Óz kezeginde, medısınalyq mekemelerdiń ózderi bul júıeni medısınalyq kómektiń sapasyn baqylaý jáne kelýlerdi baqylaý úshin qoldana alady.
Pılottyq jobany engizýge daıyndyq barysynda QR-rastaý boıynsha aldyn ala saýalnama nátıjeleri eskerilgenin atap ótken jón. Saýalnamaǵa 1105 pasıent jáne 2732 dáriger qatysty. Saýalnamany taldaý nátıjeleri boıynsha pasıentterdiń 50%-y dárigerge barýdy rastaý úshin QR kodty engizý ıdeıasyna oń kózqaraspen qaraıdy jáne 48%-y QR-rastaý arqyly qabyldaýlaryn baqylaǵysy keledi, bul pasıentterdiń oń kózqarasy men jańa quraldy engizýge daıyndyǵyn kórsetedi.