Elimizdegi medısınalyq avıasıa salasynyń qyzmeti jaıly aıtyldy
Qazaqstanda on jyldan beri medısınalyq avıasıa qyzmeti jumys isteıdi, osy ýaqyt ishinde áýe kemeleri 20 161 ret ushty. QR Densaýlyq saqtaý mınıstrliginiń Ulttyq shuǵyl medısınany úılestirý ortalyǵy medısınalyq bloginiń meńgerýshisi Nazıgúl Yrymbaeva Almaty óńirlik komýnıkasıalar qyzmetiniń brıfıńinde medısınalyq avıasıa qyzmetiniń jumysy týraly egjeı-tegjeıli aıtyp berdi dep habarlaıdy Almaty-akshamy.kz
Qazirgi kezde atalǵan avıasıa qyzmeti barlyq oblys ortalyqtarynda ornalasqan 24 ushaq pen 13 tikushaqty paıdalanady. Olardyń barlyǵy Qazaqstan Respýblıkasynyń Azamattyq avıasıa komıtetinde sertıfıkattalǵan.
Nazıgúl Yrymbaeva atap ótkendeı, árbir kezekshilik – qutqarylǵan ómir. Dál osy medısınalyq avıasıa baǵyttyń qıyndyǵyna qaramastan, kómekke muqtaj jerlerge ushyp keledi. Barlyq ushaqtar men tikushaqtar joǵary tehnologıalyq zamanaýı medısınalyq jabdyqtarmen tolyq jaraqtandyrylǵan, bul pasıentterge neǵurlym yńǵaıly, qaýipsiz jáne barynsha jyldam medısınalyq kómek kórsetýge yqpal etedi.
«2011 jyldan bastap 2021 jyldyń qyrkúıegine deıingi barlyq qyzmet kezeńinde medısınalyq avıasıa jelisi boıynsha oryndalǵan ushýlar sany 20 161 ushýdy qurady. Ushý sany jyl saıyn artyp keledi. Avıasıanyń arqasynda bizde avtokólikten eki nemese úsh ese jyldam jerde bolý múmkindigi paıda bolady. Pasıentti tasymaldaý týraly sóz bolǵanda, bul sheshýshi faktorǵa aınalýy múmkin», - dep atap ótti Nazıgúl Yrymbaeva.
El ishindegi shaqyrýlardan basqa, dárigerler shetelde aýyr halde jatqan QR azamattary men qandastardy halyqaralyq tasymaldaýdy júzege asyratynyn aıta ketý kerek. Búkil kezeń ishinde álemniń 24 eline 90 sheteldik ushý oryndaldy.
N. Yrymbaeva jyl saıyn respýblıkada medavıasıaǵa shaqyrýlar sany birtindep artyp kele jatqanyn habarlady. Bul halyqtyń habardar bolýynyń artqanyn kórsetedi.
Medısınalyq bólimniń meńgerýshisi: «2011 jyldan bastap qazirgi ýaqytqa deıin 26 576 pasıentke medısınalyq kómek kórsetildi. Pasıentterdiń jalpy sanynyń 22%-y – patologıasy bar balalar, 20%-y - JKO, jazataıym oqıǵalar men ýlanýlar nátıjesinde jaraqattary bar pasıentter, 17%-y-akýsherlik praktıkadaǵy kezek kúttirmeıtin jaı-kúıleri boıynsha pasıentter, 16%-y - qan aınalymy júıesi aýrýlarymen, 14%-y-jańa týǵan náresteler jáne 11%-y – ózge de aýrýlarmen. Bul tek sandar ǵana emes, ár ushýdyń artynda ýaqytyly jedel medısınalyq járdem kórsetilgen adamdardyń taǵdyry tur», - dep atap ótti Nazıgúl Yrymbaeva.
Barlyǵy 28 860 medısınalyq qyzmet kórsetildi, onyń ishinde: 19 286 pasıent medısınalyq uıymdarǵa tasymaldandy, 1526 operasıa jasaldy, 4242 betpe-bet konsýltasıa ótkizildi.
Shuǵyl medısınalyq kómek Densaýlyq saqtaý júıesiniń mańyzdy býyny boldy jáne bolyp qala beredi, onyń jumysynyń tıimdiligine halyqtyń densaýlyǵy men ómirin saqtaý aıtarlyqtaı táýeldi. Ony uıymdastyrý deńgeıi ana men bala ólimi, ınfarkt, ınsýlt jáne basqa da kóptegen mańyzdy kórsetkishterdiń tómendeýine tikeleı áser etedi.
Nazıgúl Yrymbaeva. Yrymbaevanyń aıtýynsha, pandemıaǵa baılanysty medavıasıa brıgadalary koronavırýspen aýyratyn naýqastardy tasymaldaýǵa daıyn.
«Áýe kemeleriniń bortynda biz pasıentterdiń de, medısına qyzmetkerleriniń de ınfeksıalyq qaýipsizdigin qamtamasyz etemiz. COVID-19 aýyratyn pasıentterdi tasymaldaǵannan keıin áýe jáne jer ústi kóligin sanıtarıalyq óńdeýge erekshe kóńil bólinedi», - dedi spıker.
Medısınalyq avıasıa qyzmeti COVID-19 koronavırýs ınfeksıasymen kúres aıasynda 2020 jylǵy naýryzdan bastap jáne 2021 jylǵy 9 aıda 249 ushýdy júzege asyrdy, 1160 pasıentke kómek kórsetti.
Sózin qorytyndylaı kele, N. Yrymbaeva Ahýal ortalyǵy táýlik boıy jumys istep jatqanyn, onyń mamandary saraptamalyq toppen birlesip, turaqty negizde anestezıologıa, reanımasıa jáne qarqyndy terapıa bólimshesindegi pnevmonıanyń aýyr túrimen aýyratyn jaǵdaıy aýyr pasıentterge kúndelikti monıtorıń jáne taldaý júrgizetinin habarlady. Jyl basynan medısına mamandary mundaı pasıentter úshin 182 872 konsýltasıa ótkizdi.