Almatynyń eń kórikti ári kórnekti oryndarynyń biri – «Medeý» muz aıdynyna 28 jeltoqsan kúni 50 jyl tolady.
Búgin «Medeý» bıik taýly sport kesheniniń 50 jyldyǵyna muz aıdyny aýmaǵynda saltanatty mereke ótip jatyr.
Merekelik is-sharanyń aldynda Almaty qalasy sport ǵımarattary dıreksıasynyń basshysy Elena Tó, «Medeý» muz aıdyny qurylys avtorlarynyń biri Borıs Iaglınskıı, 1998 jylǵy Olımpıada oıyndarynyń qola júldegeri Lúdmıla Prokasheva jáne 2019 jylǵy álem chempıonatynyń kúmis júldegeri, Qazaqstannyń tórt dúrkin chempıony Elızabet Tursynbaevanyń qatysýymen baspasóz konferensıasy ótti.
«Medeý» muz aıdynynyń 50 jyldyǵyna oraı merekelik kesh uıymdastyryp, bizge jetken osyndaı kórnekti orynnyń tarıhyn, munda oryn alǵan qanshama tarıhı oqıǵalardy keleshek urpaqqa kórsetkimiz keldi. Sondaı-aq, búgin mereıtoıǵa oraı muz aıdynynda jas kónkıshiler arasynda ashyq jarys ótkizdik. Bul da burynnan kele jatqan dástúr. 2023-2024 jyldary «Medeý» sport kesheninde birneshe halyqaralyq jarysty ótkizýdi josparlap otyrmyz. Osyndaı sharalardyń arqasynda «Medeýdiń» sporttyq ataǵyn qaıtaramyz degen úmittemin», – dedi Almaty qalasy sport ǵımarattary dıreksıasynyń basshysy Elena Tó.
«Medeý» muz aıdynynyń 50 jyldyǵyna arnalǵan mereke kórnekti qazaq sportshylary men jattyqtyrýshylarynyń sherýimen ashyldy. «Urpaqtan urpaqqa» atalǵan kesh resmı ashylǵan soń Almaty qalasy ákiminiń orynbasary Arman Qyryqbaev qala turǵyndaryn osynaý aıtýly merekemen quttyqtady.
«Tek Almatynyń emes, Qazaqstannyń kózaıymy, týrıser men qala turǵyndarynyń, jastardyń súıikti demalys orny – «Medeý» muz aıdynynyń 50 jyldyǵymen qala basshylyǵynyń atynan quttyqtaımyn! Jartyǵasyrlyq tarıhy bar bul jerde 350-ge jýyq álemdik rekord ornatylǵan. Aldaǵy jyldary «Medeýde» úlken jóndeý jumystary jasalady. Kórnekti orynnyń tarıhı kelbeti saqtalady, tek ınfraqurylymyn jetildirý josparlanǵan», – dedi A.Qyryqbaev.
Quttyqtaý alǵysózinen keıin qala turǵyndary men ońtústik astana qonaqtary aldynda álemge áıgili sport sheberleri óner kórsetti. Atap aıtqanda, muz aıdynynda óziniń erekshe baǵdarlamasymen qazaqstandyq mánerlep syrǵanaýshy, 2019 jylǵy álem chempıonatynyń kúmis júldegeri, 2019 jylǵy Qysqy Ýnıversıadanyń kúmis júldegeri jáne II Qysqy jasóspirimder Olımpıadasynyń qola júldegeri Elızabet Tursynbaeva óner kórsetti.
Mereke aıasynda Anastasıa Ignatevanyń dırıjerlik etýimen aty ańyzǵa aınalǵan «Muzdy sımfonıa» muz baleti men Ilá Overbýhtyń «Júrek te janyp tur» gala-shoýy ótti. Sonymen qatar, kórermender qazaqstandyq tuńǵysh muz shoýy – «Olumpic Show» qoıylymyn tamashalady.
Qazir keshki konserttiń basty juldyzy retinde tanymal qazaqstandyq ánshi Moldanazar óner kórsetedi. Shoý barysynda túrli oıyn-saýyq, ınteraktıvti alańdary men tarıhı aımaqtar jumys istep tur. Merekelik shara túrli-tústi otshashýmen aıaqtalady.
Aıta ketken jón, 1972 jyly 28 jeltoqsan kúni Almatyda búkil álemge áıgili «Medeý» muz aıdynynyń ashylýy boldy.