Balýan Sholaq atyndaǵy sport jáne mádenıet saraıynda shahmattyń rapıd jáne blıs túrinen álem chempıonaty ashyldy.
Saltanatty ashylý rásimine halyqaralyq shahmat federasıasynyń prezıdenti Arkadıı Dvorkovıch, Almaty ákimi Erbolat Dosaev, Mádenıet jáne sport mınıstri Dáýren Abaev, álem chempıonatyna qatysýshy elderdiń elshileri, memleket jáne qoǵam qaıratkerleri qatysty.
«Almatyǵa álemniń úzdik shahmatshylary jınaldy. Osyndaı mańyzdy jarysty ótkizýge atsalysqan Halyqaralyq shahmat federasıasyna alǵysymdy bildiremin. Mundaı álemdik jarystyń Qazaqstanda ótýi sporttyń bul túrin elimizde damytýǵa kómektesetini sózsiz. Elimizdiń shahmatshylary eresekter men jasóspirimder arasynda da iri halyqaralyq jeńisterge jetip júr. Biz shahmatty elimizde ári qaraı damytýdy jalǵastyramyz», – delingen Prezıdent quttyqtaýynda.
Almaty qalasynyń ákimi Erbolat Dosaev jarysqa qatysýshylarǵa sáttilik tiledi.
«Shahmattan Álem chempıonatynyń Almatyda ótýi – biz úshin úlken mártebe. Bul shara shaharymyz úshin osy jyldyń sońǵy aýqymdy jarysy. Qala qonaqtary Almatynyń jyly shyraıyn sezinedi degen úmittemin. Shyn myqty jeńiske jetsin», – dedi qala basshysy Erbolat Dosaev.
Óz kezeginde Mádenıet jáne sport mınıstri Dáýren Abaev halyqaralyq jarystyń elimiz úshin oń áser etetinin aıtty.
«Almaty ákimdigine jarysty uıymdastyryp, qonaqjaılyq tanytqany úshin alǵys aıtamyn. Bul týrnırdiń elimiz úshin oń áser etetinine tolyq senimdimin. Myńdaǵan balalarymyz osy jarystan soń shahmatpen aınalysyp, olardyń arasynan bolashaq chempıondar shyǵatynyna senimdimin. Jarysqa qatysýshylarǵa sáttilik tileımin», – dedi D.Abaev.
Jahandyq dodaǵa 50 eldiń úzdik 290 shahmatshysy qatysady. Ashyq týrnırge 176 oıynshy qatysady. Saıystyń favorıti - sońǵy 10 jyldaǵy álem chempıony Magnýs Karlsen (Norvegıa).
Áıelder týrnırinde 100-den astam sportshy baq synaıdy. Qazaqstannyń namysyn álemge áıgili shahmatshylar Jansaıa Ábdimálik pen Bıbisara Asaýbaeva qorǵaıdy.
Chempıonat 26-28 jeltoqsan aralyǵynda rapıd oıyndarymen bastalady, blıs oıyndary 29-30 jeltoqsan aralyǵynda ótedi. Sol kúni jeńimpazdardy marapattaý jáne jarystyń jabylý rásimi bolady.
2022 jyl FIDE shahmattaǵy áıelder jyly dep jarıalandy. Osy is-shara aıasynda 2022 jylǵy 27 jeltoqsanda FIDE basqarýshy dırektory, áıelder grosmeısteri Dana Reıznıese-Ozola sheberlik saǵatyn jáne talantty qazaqstandyq qyzdarǵa arnap bir mezgilde oıyn seansyn ótkizedi.
Jarys kúnderi tóreshiler korpýsyna arnalǵan FIDE semınarlary, balalar men barlyq áýesqoıǵa arnalǵan bir mezgilde oıyn seanstary men blıster, IT saladaǵy baǵdarlamashylar úshin jeke týrnır ótedi.
Týrnırdiń uıymdastyrýshylary FIDE jáne Qazaqstan shahmat federasıasy. Chempıonat Almaty qalasy ákimdiginiń jáne Qazaqstan Respýblıkasy Mádenıet jáne sport mınıstrliginiń qoldaýymen ótkiziledi.
Shahmat saıysyna bıletterdi satý servısinen alýǵa bolady, balalarǵa kirý tegin. Buǵan qosa, týrnır chess24.com jáne chess.com syndy jahandyq onlaın alańdarda kórsetiledi.
Chempıonat kestesi men baǵdarlamasyn chempıonattyń worldrapidandblitz2022.fide.com saıtynan bilýge bolady.