Qala ákimi Medeý aýdanynyń turǵyndarymen kezdesti.
Almaty ákimi Erbolat Dosaev Medeý aýdanyndaǵy sapaly aýyz sýmen kanalızasıa máselesi qalaı sheiletinin aıtty, dep habarlaıdy Almaty-akshamy.kz.
«Ótken kezdesýde Sizder Medeý aýdanynda halyqty sapaly aýyz sýmen jáne kanalızasıamen qamtamasyz etý máselelerin kótergen bolatynsyzdar. Birinshiden, "Dýman" yqshamaýdanynda sorǵy stansıasy men kólemi 1800 tekshe metr bolatyn 2 rezervýar qaıta jańǵyrtylýda. Jumysty aǵymdaǵy jyldyń sońyna deıin aıaqtaýdy josparlap otyrmyz»,- dedi qala basshysy Medeý aýdanynyń turǵyndarymen kezdesý barysynda.
Ákimniń aıtýynsha, aǵymdaǵy jyldyń qarasha aıynda Iýbıleınyı (265 abonent) yqshamaýdanynda 1,2 km kanalızasıa jelilerin qaıta jańǵyrtý, sondaı-aq úsh kóshe (Gornaıa kóshesi, Batýrın kóshesi jáne Begalın kóshesi, 129 abonentti qamtıdy) boıynsha 1,4 km sý qubyry jelisiniń jumystary aıaqtalady. Bul jumystar Kokkınakı, Lýganskıı jáne Elebekov kóshelerinde jalǵasyp, 2023 jyldyń İİ toqsanynda aıaqtalady.
"Keńsaı" yqshamaýdanynda sý qubyry jáne kanalızasıa jelilerin salý jobasy boıynsha konkýrs ótkizilip, merdiger anyqtaldy. Qurylys-montaj jumystarynyń bastalýy 2023 jyldyń kóktemine josparlanǵan. "Kamenskoe plato" yqshamaýdanynda sýmen jabdyqtaý jáne sý burý jelileriniń joqtyǵyna qatysty máselelerdi sheshý úshin zertteý júrgizildi, onyń nátıjeleri boıynsha qazirgi jobany qurylys materıaldarynyń qymbattaýyna, sondaı-aq taýly jerlerdiń kúrdeli relefine baılanysty sý qubyry jáne kanalızasıa jelilerin salý boıynsha túzetýge jiberý týraly sheshim qabyldandy. Qurylysty 2023 jyldyń kókteminde bastaýdy josparlap otyrmyz»,- dedi Erbolat Dosaev.
Sý kózimen qamtamasyz etý úshin "Muztaý" jáne "Kólsaı" yqshamaýdandarynda «Balqash» JBQ-da NS-2 keńeıtý jobasyn ázirleýde. Sondaı-aq "Muztaý" men "Kólsaı" yqshamaýdan jalpy uzyndyǵy 3,8 km quraıtyn magıstraldy sý qubyry jelisin qosatyn qurylystyń JSQ ázirlenýde, qurylys-montajdaý jumystarynyń bastalýy 2023 jyldyń II toqsanyna josparlanǵan.
«Qosymsha, aǵymdaǵy jyldyń sońyna deıin "Sulýsaı" yqshamaýdandaǵy sýmen jabdyqtaý jelileriniń qurylysyna jáne 2 uńǵymany burǵylaýǵa JSQ ázirleý aıaqtalady. QMJ-ǵa kelesi jyldyń kókteminde kirisýdi josparlap otyrmyz»,- dedi ákim.