Almaty qalasy Medeý aýdanynyń ákimi Áset Masabaev Óńirlik komýnıkasıalar qyzmetinde ótken brıfıńte sýmen jabdyqtaý, kóshelerdi jóndeý jáne abattandyrý boıynsha aýdanda josparlanǵan jáne júzege asyrylǵan jumystar týraly aıtty, dep habarlaıdy almaty-akshamy.kz
Áset Masabaev 2021 jyldyń birinshi jartyjyldyǵynda ónerkásiptik ónim óndirý kólemi 54,1 mlrd. teńge, al ınvestısıa kólemi 64,6 mlrd. teńgeni quraǵanyn atap ótti. Qalalyq kólemde aýdannyń ınvestısıasyn ıgerý úlesi 14%-dy quraıdy.
Áset Masabaev "Jańa Almaty" shet aımaqtaryn damytýdyń 2020-2024 jyldarǵa arnalǵan keshendi josparyn iske asyrý týraly habarlady. Ákimniń málimetinshe, Medeý aýdanynyń shetinde sýmen jabdyqtaý jáne sý burýdyń ınjenerlik jelileri júrgiziledi. Mysaly, Dýman shaǵynaýdanynda jalpy uzyndyǵy 44,5 km sýmen jabdyqtaý jáne sý burý ınjenerlik jelilerin tóseý boıynsha jumystar aıaqtaldy, qazirdiń ózinde 714 úıdi sýmen jabdyqtaý boıynsha shart jasaldy.
"Kólsaı shaǵynaýdanynda jumystar aıaqtaldy. Onda 230 úı sýmen qamtamasyz etildi. Injenerlik jeliler "Muztaý" jáne "Kamenskoe plato" shaǵynaýdandarynda júrgizildi. Ár aýdanǵa 15-ten 17 kılometrge deıin sýmen jabdyqtaý jelileri júrgiziledi", – dedi A.Masabaev.
Aýdan ákimi Medeý aýdanynyń jaǵalaýy men basqa da aýmaqtarynyń kúrdeli jóndeý jumystaryna toqtaldy. Onyń aıtýynsha, bul aýmaqtardy abattandyrýdyń basty mindeti — Almaty jaǵalaýlaryn jaıly ári qaýipsiz jerge aınaldyrý.
"Respýblıka saraıynan Gogol kóshesine deıingi aralyqta Kishi Almaty ózeniniń jaıaý júrginshiler aımaǵyn abattandyrý jumystary aıaqtaldy. Jamaqaev kóshesinen sý bólgishke deıin Esentaı ózeniniń jaǵalaýyn qaıta jańartý bastaldy. Jumystardy jyl sońyna deıin aıaqtaý josparlanǵan. Tiksaı ózeniniń arnasyn qaıta jańartý júrgizilýde. Jumystardy aıaqtaý 2022 jylǵa josparlanǵan", – dedi Medeý aýdanynyń ákimi.
Sonymen qatar Jasyl ekonomıka basqarmasy oqýshylar saraıy men memlekettik murajaıdyń irgeles aýmaǵyn abattandyrýdy josparlap otyr. Jobalyq-smetalyq qujattama daıyndaldy.
Áset Masabaev jan-jaqty aıtyp ótken taǵy bir mańyzdy baǵyt – Medeý aýdanynyń jol-kólik ınfraqurylymyn jaqsartý.
Onlaın-brıfıng barysynda aıtylǵan málimetter boıynsha, uzyndyǵy 25 shaqyrymnan asatyn aýdannyń 27 kóshesinde jóndeý jumystary aıaqtaldy. Almaty qalasynyń qalalyq mobıldilik basqarmasy 2021 jylǵa 49 kósheni jóndeýdi josparlady, qazir 6 kósheniń jol tósemi jóndelýde.
"Dýman shaǵynaýdanyndaǵy uzyndyǵy 27 shaqyrymnan asatyn 53 kósheniń joldaryna kúrdeli jóndeý jumystary júrgizilýde. Búginde 33 kóshede jumystar aıaqtaldy. 20 kóshede jóndeý jumystary júrgizilýde. Sondaı-aq Dostyq dańǵylynan Omarova kóshesindegi jaıaý júrginshiler aımaǵyna bıyl jóndeý jumystary bastaldy", – dedi aýdan ákimi.
Sóz sońynda Áset Masabaev aýdandaǵy kóshe jaryǵyn qalpyna keltirý týraly aıtty. "Almaty Qala Jaryq" uıymy qazirgi ýaqytta 17 918 jaryq nysandaryna qyzmet kórsetý jumystaryn júrgizýde. Jeliniń uzyndyǵy 457 shaqyrymnan asady.
Aıta ketsek, qala ákimi Baqytjan Saǵyntaevtyń tapsyrmasy boıynsha "Shetsiz qala" qaǵıdaty aıasynda Medeý aýdanynda 273 kóshe syrtqy jaryqtandyrý jelileriniń qurylysyna qosylǵan. 10 614 sham ornatý josparlanǵan. Búginde Medeý aýdanynyń 205 kóshesi jaryqtandyryldy.