Kópjyldyq máseleni sheshý: Almaty ákimi Medeý aýdanynyń turǵyndarymen kezdesti
Almaty ákimi Erbolat Dosaev Medeý aýdanynyń turǵyndarymen kezdesip, ekonomıkalyq kórsetkishterdi aıtyp, turǵyndardyń suraǵyna jaýap berdi, dep habarlaıdy aqshamnews.kz
Qala basshysy eń úlken aýdanda bıznes orta damyp kele jatqanyn atap ótti, búginde munda 45 myńnan astam kásipkerlik sýbekt jumys isteıdi. Osy jyldyń 7 aıynyń qorytyndysy boıynsha olar búdjetke 250 mlrd teńgeden astam quıǵan nemese jalpy qalalyq salyq túsimniń 23%-y solarǵa tıesili.
Sonymen qatar, jyl basynan beri qurylys jumystary 13,3% ulǵaıdy, negizgi kapıtalǵa salynǵan ınvestısıa 12,5% ósip, 133 mlrd teńgege jetti.
Aýdan turǵyndaryn sapaly sýmen jáne kárizben qamtamasyz etý basym máseleniń biri bolyp qala beredi. Bul baǵytta mańyzdy nátıjege qol jetti – shahar basshysynyń tapsyrmasymen bıyl «Balqash» taza sý rezervýary paıdalanýǵa berildi. 7,3 myń tekshe metr sýǵa 7 rezervýar salyndy, táýligine 15,7 myń m3 sý ótkizý qabileti bar 3 jańa uńǵyma qaıta jańartylyp, 3 jańa uńǵyma salyndy. Bul «Kamensk ústirti» shaǵyn aýdanyndaǵy sý tapshylyǵy máselesin sheshti.
Bıyl shildede Memleket basshysynyń tapsyrmasymen qýaty táýligine 32 myń tekshe metr sýmen jabdyqtaýdyń rezervtik sqemasy paıdalanýǵa berildi. Sýdyń negizgi kózderi jer asty sýlarynyń Talǵar ken oryndary, ol jerden sý kaskadty tásilmen beriledi. Jobany júzege asyrýdyń arqasynda aýdannyń 50 myń turǵyny sýmen turaqty qamtamasyz etildi.
Erbolat Dosaev taýly jáne taý bókterindegi aýdan turǵyndarynyń qaýipsizdigin qamtamasyz etý máselesin qozǵady. Atap aıtqanda, qala basshysy bıyl aqpanda «Taýsamaly» shaǵyn aýdanynda bolǵan laı kóshkininiń saldaryn joıý boıynsha qabyldanyp jatqan sharalarǵa toqtaldy. 2024 jyly naýryz aıynan bastap 1 500 sharshy metr eńistik aýmaǵy qoqystan jáne qıraǵan qurylymnan tazartyldy, kólemi 800 tekshe metr temirbeton qurylymy bólshekteldi, gabıon konstrýksıalary ornatyldy. Keregeli-torly júıeni ornatý jalǵasýda. Osy jyldyń qazan aıyna deıin drenajdyq qubyrlar, aryq júıesi jáne qudyqtar ornatylady. Bul jumystarǵa 1,5 mlrd teńge bólindi.
Qala ákiminiń tapsyrmasymen qurylǵan jumys toby aýdannyń 74 qaýipti ýchaskesin tekserdi, 10 ýchaskede jaǵdaı turaqty, qosymsha jumystar júrgizýdi talap etpeıdi. Kóshkin qaýpi joǵary 11 ýchaskeniń 5-in nyǵaıtý jáne qalǵan 6 ýchaskeni satyp alý jóninde sheshim qabyldanady. 53 ýchaske boıynsha keshendi jumystar josparlanǵan.
- Jol-kólik ınfraqurylymyn damytýdy tilge tıek etken qala basshysy jyl sońyna deıin 64 myń sh.m. jol tósemi aǵymdaǵy jóndeýden ótetinin, qazir 43,3 myń sh. m. jóndelgenin, sondaı-aq 26 kóshede 23 km joldy ortasha jóndeý júrgizilip jatqanyn, onyń ishinde 6,6 km jol jóndelgenin aıtty.
- Medeý aýdanynda oqýshy oryndarynyń tapshylyǵy máselesin sheshý úshin 2025 jyldyń sońyna deıin úsh jańa mektep ashý josparlanǵan. Olar «Jaıly mektep» ulttyq jobasy aıasynda salynyp jatqan 2 myń oryndyq jáne «Dýman» shaǵyn aýdanynda jáne Talǵar tas jolyndaǵy 1 800 oryndyq eki mektep.
Jaıly demalys úshin almatylyqtardyń súıikti ornyna aınalǵan – Terenkýr qaıta jańǵyrtylyp jatyr, sondaı-aq «Býtakovka» ózeniniń arnasy nyǵaıtylyp, janynda jańa qoǵamdyq keńistik paıda bolady. Eki nysandaǵy jumystardy osy jyldyń sońyna deıin aıaqtaý kózdelgen.