Fransıa quramasynyń shabýylshysy Kılıan Mbappe Eýropa chempıonatynyń alǵashqy týrynyń Avstrıamen ótken machynda jaraqat alyp qaldy, dep habarlaıdy almaty-akshamy.kz.
Ázirge Eýro fransýz juldyzy úshin kúrdeli týrnır bolyp tur. Álem chempıonattaryndaǵy 14 machta 12 golmen kózge túsken Mbappe Eýropa birinshiliginde mergendik tanyta almaı-aq qoıdy. Quramasynyń alǵashqy oıynynda da Kılıanǵa artylǵan úmit zor boldy. Biraq bul joly da sáttilik joldas bolmady. Qarsylas qaqpashysymen jeke dara qalǵan onyń soqqysy qaqpadan qıys ketti.
Iá, bul machta Fransıa jeńgenimen, onyń ózinde jalǵyz goldy Avstrıa fýtbolshysy Maksımıllıan Iober óz qaqpasyna baǵyttap aldy.
Tablodaǵy bir gol aıyrmashylyǵy eki komandaǵa da úlken jaýapkershilik júktegendeı. Sondyqtan oıynda fýtbolshylardyń qaqtyǵysyna kóp kýá boldyq. Birde Baýmgartner qaqpashy Mık Menánnyń betine býtsymen tebe jazdaǵany úshin sary qaǵaz alsa, taǵy birde Antýan Grızmann jarnama baǵanyna ońbaı soǵylyp, mańdaıy jaryldy.
Jankúıerlerdiń janyn ushyrǵan sát, árıne, kóshbasshy Mbappeniń tumsyǵynyń buzylýy. Avstrıalyq qorǵaýshy Kevın Danzomen dopqa talasta Mbappe onyń ıyǵyna murnymen soǵylyp, kópshilik shabýylshynyń murnynan qan ketkenin kórdi. Bastapqyda onyń jaraqaty kúrdeli, operasıa qajet, sondyqtan Kılıan aldaǵy oıyndarǵa qatysa almaýy múmkin degen aqparat taraǵan. Onyń ústine fýtbolshyny aýrýhanaǵa jedel járdemmen alyp ketti. Biraq medısınalyq tekseristen keıin Mbappege operasıa qajet emestigi anyqtaldy. Endi ol juma kúni Nıderland quramasyna qarsy machta alańǵa shyǵýy múmkin.