Senat tóraǵasy Máýlen Áshimbaev TMD-ǵa múshe memleketterdiń Parlamentaralyq Assambleıasy baıqaýshylar mısıasynyń ókilderimen kezdesti. Almaty-akshamy.kz bul týraly palatanyń baspasóz qyzmetine silteme jasap habarlaıdy.
Máýlen Áshimbaev parlamentshilerge Qazaqstan prezıdenti saılaýyn baıqaýǵa qatysqany úshin alǵys bildirdi. Sondaı-aq palata spıkeri elimiz halyqaralyq baıqaýshylardyń saılaýǵa qatysýyna úlken mán beretinin jáne obektıvti monıtorıń úshin barlyq qajetti jaǵdaı jasalǵanyn atap ótti.
Senat tóraǵasy saılaýdy tolyǵymen ulttyq zańnamaǵa jáne osy saladaǵy halyqaralyq standarttarǵa sáıkes ótkizý úshin qajetti sharalar qabyldanǵanyn tilge tıek etti. Barlyq kandıdat úshin saılaý aldyndaǵy úgit-nasıhat jumystaryn júrgizýge teń jaǵdaı jasalǵany da nazardan tys qalǵan joq.
Sonymen qatar M.Áshimbaev Parlamenttiń elimizde júrgizilip jatqan reformalardy zańnamalyq turǵydan qamtamasyz etý baǵytyndaǵy jumysyna toqtaldy. Adam quqyqtaryn qorǵaý júıesin nyǵaıtýǵa, bılik tarmaqtary men ortalyq pen aımaqtar arasyndaǵy ókilettikter men jaýapkershiliktiń tepe-teńdigin qamtamasyz etýge arnalǵan jaqynda qabyldanǵan konstıtýsıalyq zańdar týraly da sóz boldy.
«Qabyldanǵan konstıtýsıalyq zańdar azamattarymyzdyń suranysy men múddelerine saı keletin jańa saıası model qalyptastyrýǵa septigin tıgizedi dep senemiz. Jańa normalar azamattardyń memlekettik jáne saıası ınstıtýttarǵa degen senimin nyǵaıtýǵa da yqpal etedi. Aldaǵy prezıdent saılaýy qazaqstandyqtardy demokratıalyq transformasıa men reformalar ıdeıasy tóńireginde biriktire túsedi dep úmittenemiz», – dedi Máýlen Áshimbaev.
Óz kezeginde TMD PAA baıqaýshylar mısıasynyń koordınatory Dılrabo Mansýrı saılaý prosesiniń jalpyǵa birdeı qabyldanǵan demokratıalyq standarttarǵa sáıkes joǵary deńgeıin atap ótti. TMD PAA parlamentshileri senatorlarǵa kóp jylǵy ózara is-qımyl úshin alǵysyn bildirip, parlamentaralyq yntymaqtastyqty odan ári nyǵaıtýǵa múddeli ekenderin de jetkizdi.