Altyn medal alǵan oqýshy 1 500 AEK, kúmis medal úshin 1 000 AEK, qola medal úshin 500 AEK kóleminde aqshalaı syıaqy alady
Jyl basynan beri 252 qazaqstandyq oqýshy negizgi pánder boıynsha halyqaralyq olımpıadalarda medal jeńip aldy. Olar el qorjynyna 45 altyn, 78 kúmis, 129 qola medal ákeldi, dep habarlaıdy Almaty-akshamy.kz Oqý-aǵartý mınıstrliginiń baspasóz qyzmetine silteme jasap.
Olar matematıkadan qashyqtan ótken halyqaralyq Azıa-Tynyq muhıty olımpıadasy, matematıkadan halyqaralyq «Jibek joly» olımpıadasy, matematıkadan Balqan olımpıadasy, hımıadan oqýshylar arasyndaǵy halyqaralyq Mendeleev olımpıadasy, fızıkadan Azıa olımpıadasy (APhO), mamandandyrylǵan mektepterdiń oqýshylaryna arnalǵan matematıka, fızıka jáne ınformatıkadan Halyqaralyq Jáýtikov olımpıadasy sıaqty bedeldi qurlyqtyq olımpıadalarda Qazaqstannyń namysyn qorǵady.
«Osy jyly halyqaralyq pándik olımpıadalarǵa qatysýshylar sany 600 oqýshyǵa deıin jetti. 27 oqýshymyz ótken jyldardyń rekordyn jańartyp, eń bedeldi 7 halyqaralyq olımpıadada, atap aıtqanda, IMO, IPhO, IBO, IOL, IchO jáne t.b. olımpıadalarda júldeli oryndarǵa ıe boldy. Oqýshylarymyz osy olımpıadalarǵa qatysý tarıhynda alǵash ret 73 mln teńgeden astam syıaqy aldy. Sondaı-aq olarǵa otandyq joǵary oqý oryndarynda oqý úshin granttar berildi. Kelesi jyly balalarǵa osyndaı qoldaý kórsetiletin olımpıadalar tizimi 7-den 14-ke deıin artady», - dedi Orta bilim berý komıtetiniń tóraǵasy Gúlmıra Kárimova.
Altyn medal alǵan oqýshy 1 500 AEK, kúmis medal úshin 1 000 AEK, qola medal úshin 500 AEK kóleminde aqshalaı syıaqy alady. Sondaı-aq oqýshylardy jarysqa daıyndaǵan ustazdar da birjolǵy syıaqy alady.