Komýnıkasıa jelilerin tartqannan keıin qazaqstandyqtarǵa 10 sotyq jer telimin taratýda esh qıyndyq bolmaıdy.
Bul týraly Senat Tóraǵasy Máýlen Áshimbaev aıtty, dep habarlaıdy Almaty-akshamy.kz
Senattyń jalpy otyrysynan keıin tilshiler palata tóraǵasynan qazaqstandyqtardyń 10 sotyq jerdi alýǵa belsendi túrde qujat tapsyrýyna qatysty suraq qoıdy.
«Jeke óz basym jer telimine ótinim bergen joqpyn. Atap aıtqanda, jer ýchaskesine ótinim berýge ár azamat quqyly. Negizi, elimizde jer barshylyq, bul turǵyda adamdarǵa durys túsindirý kerek. Qazaqstan aýmaǵy aýqymdy, terıtorıa jetkilikti, 10 sotyq telimnen Qazaqstan azamattaryna taratýǵa bolady. Meniń oıymsha, biz osyǵan birtindep kelemiz. Degenmen bul jer telimderine komýnıkasıalardy tartý máselesi bar. Ol jerlerde joldar, elektr jaryǵy, sý, káriz júıesi bolǵany jón», - dedi M. Áshimbaev.
Osy oraıda ol ınjenerlik jelilerge qatysty másele bar ekenin, bul baǵyttaǵy taqyryptardy depýtattar kóterip júrgenin aıtty.
«Jyl saıyn komýnıkasıany tartýǵa tıisti qarajat bólinip jatyr, bul jumystar jalǵasa beredi. Sondyqtan kezeń-kezeńmen ákimdikter, Úkimet atalǵan máselelerdi sheship, bizdiń azamattar qajetti jer telimderin jeke turǵyn úı qurylysyna alady dep sanaımyn», -dedi Senat tóraǵasy.
Eske sala keteıik, qazaqstandyqtar endi jeke turǵyn úı qurylysyna jer alý úshin eGov.kz portaly arqyly kezekke tura alady.