M.Áýezov atyndaǵy Qazaq ulttyq drama teatrynyń kishi zalynda kameralyq spektáklder sherýi bastaldy.
Qoıylymdardyń shymyldyǵyn Janserik Serikbaıdyń rejıserligimen qoıylǵan “Júz” psıhologıalyq dramasy ashty. Sondaı-aq spektáklder sherýiniń alǵashqy kúninde Eralhan Myrzahmettiń rejıserligimen “Kóbelektiń áni” dramasy sahnalandy.
M.Áýezov atyndaǵy Qazaq ulttyq drama teatrynyń dırektory Erkin Jýasbek kameralyq spektáklder aptalyǵy nátıjesinde jas 4 rejıserdiń bireýi teatrǵa jumysqa alynatynyn aıtty.
«Bizge byltyr jas dramatýrgtardan 10 pesa túsken. Sol pessalardy spektalge aınaldyrýdy oıǵa aldyq. Sondyqtan biz jas rejıserlerdi shaqyryp, olarmen kameralyq spektalderdi qoıyńyzdar dep, teatrda múmkindik berdik. Basynda jeteý edi, endi mine tórteýi nátıjege jetip otyr. Endi mine biz 4 balanyń ishinen bireýin tańdap, teatrǵa alsaq degen oıymyz bar. Ol úshin eki kúnniń ishinde 4 spektal kórsetilip, spektaldiń talqylaýy ótkiziledi», - dedi M.Áýezov atyndaǵy Qazaq ulttyq drama teatrynyń dırektory Erkin Jýasbek.
Aıta keteıik, búgin “Mahabbatqa qyzmet” (rej. Álibek Qosýbaq) jáne “Úzilgen úmit” (Aqylbek Hamıtov) dramalary teatrdyń kishi zalynda sahnalady. Kirý tegin.
«Júz» men rejıser retinde úlken sahnaǵa shyǵarǵan alǵashqy qoıylym. Pessanyń aty - “Ádilet”, avtory - Madına Omarova. Alǵashqy on shaqty pessany qatar oqyp, ózime unaǵany osy boldy. Spektákldi qoıý barysynda avtormen baılanysta boldyq jáne keı sheshimderdi ózgertip otyrdyq. Mysaly oılasa otyryp atyn “Júz” dep ózgerttik. Bul qoıylym tájirıbe retinde qalsa da, teatrdyń repertýaryna qosylsa da qýanamyn. Oıymyzdaǵy, ishimizdegi aıtqymyz kelgen nárseni sahna arqyly jetkizýge tyrystyq. Al ári qaraı spektákl taǵdyryn teatr men kórermender sheshedi», - dedi jas rejıser, T.Júrgenov atyndaǵy Óner akademıasynyń magıstranty Janserik Serikbaı.