Azıa-Tynyq muhıty jáne «Jibek joly» halyqaralyq matematıkalyq olımpıadalary bastaldy, dep habarlaıdy Almaty-akshamy.kz.
El namysyn ár óńirden qatysatyn 157 oqýshy qorǵaıdy. Olar «Matematıka» páni boıynsha respýblıkalyq olımpıadanyń oblystyq kezeń jeńimpazdary men júldegerleri. Uıymdastyrýshylardyń aıtýynsha, zıatkerlik jarystar matematıka ǵylymdary salasyndaǵy daryndy oqýshylardy anyqtaýǵa, sharaǵa qatysýshy elder arasynda halyqaralyq bilim berý jáne ǵylymı baılanystardy damytýǵa baǵyttalǵan.
«Qazaqstannan bul olımpıadalarǵa jyl saıyn 120-dan asa oqýshy qatysady. 2003 jyldan bastap bizdiń olımpıadashylar 65 altyn, 182 kúmis jáne 302 qola medal jeńip aldy», - deıdi «Daryn» RǴPO zıatkerlik is-sharalardy uıymdastyrý jáne halyqaralyq yntymaqtastyq bóliminiń meńgerýshisi Abaı Dúısen.
Aıta keteıik, Azıa-Tynyq muhıty halyqaralyq olımpıadasyna Argentına, Avstralıa, Kanada, Gonkong, Indonezıa, Japonıa, Qazaqstan, Koreıa, Malaızıa, AQSH, Túrkıa, Meksıka sekildi 38 el qatysady.
Al «Jibek joly» olımpıadasynda Uly Jibek joly boıynda ornalasqan elderdiń daryndy oqýshylary jarysady.