Polıseıler 250-den astam erlik áreketter jasap, 400-ge jýyq adamnyń ómirin saqtap qaldy
İİM-de qyzmet babynda erlik tanytyp, boryshyn abyroımen atqarǵan polısıa qyzmetkerlerine qurmet kórsetildi, dep habarlaıdy Almaty-akshamy.kz Polisia.kz saıtyna silteme jasap.
Qarýly qylmyskerlerdi ustaý kezindegi janqıarlyǵy jáne adam ómirin ajaldan arashalaý barysyndaǵy jedeldigi úshin vedomstvo basshysy Marat Ahmetjanov áriptesterine alǵys bildirdi.
«Qazaqstandyq polısıa tarıhynda biz maqtan tutatyn batyrlyqtyń mysaldary kóp. Sońǵy jyldardyń ózinde polıseıler 250-den astam erlik áreketter jasap, 400-ge jýyq adamnyń ómirin saqtap qaldy», – dedi ishki ister mınıstri.
Shymkent qalasy polısıa departamenti Turan aýdany polısıa basqarmasynyń jedel ýákili Arman Áripjanov pen Jambyl oblysy polısıa departamenti Sarysý aýdany polısıa bóliminiń jedel ýákili Beken Qonysov İİ dárejeli “Aıbyn” ordenimen nagradtaldy. 20 aqpanda Arman Áripjanov óz ómirine qaýip tóngenine qaramastan, Shymkent qalasyndaǵy qarý-jaraq dúkenine qaraqshylyq shabýyl jasaǵan kúdiktini ustady.
«Sol kúni áriptesim ekeýmiz beınebaqylaý kameralaryn qarap júrgen edik. Qarý dybysyn estigen sátte dereý syrtqa júgirip shyqtym. Oqýshylar men stýdentter óte kóp boldy. Solardyń bárin shetke shyǵýǵa ótinip, qarýly azamattyń artynan júrip otyrdym. Qolaıly sátti kútip, avtokóliktiń mańyna kelip, qoıan-qoltyq urys tásilin qoldanyp, qarýyn tartyp aldym. Eshqandaı qorqynysh bolǵan joq. Sebebi birinshi orynda adamdardyń qaýipsizdigin saqtap, qylmyskerdi qolǵa túsirý boldy», – dedi Shymkent qalasy PD Turan aýdany polısıa basqarmasynyń jedel ýákili.
Al Beken Qonysov 19 aqpan kúni Jambyl oblysy Jańatas qalasynda qarýly qylmyskerlerdiń qylmystyq áreketiniń jolyn kesý kezinde batyldyq pen erlik tanytty.
«Qoǵamǵa qaýip tónip turǵandyqtan, eshqandaı qıyndyqqa qaramastan, qylmyskerdi toqtatýǵa tyrystyq. Áriptesterimmen birlesken jumystyń nátıjesinde ol qolǵa tústi», – dedi Jambyl oblysy PD Sarysý aýdany polısıa bóliminiń jedel ýákili.
Sondaı-aq bul kúni Taraz qalasynda bes adamnan turatyn otbasyny gazben ýlanýdan qutqarǵan kámeletke tolmaǵandar isi jónindegi ýchaskelik polısıa ınspektory Álisher Ermekov marapattaldy. Oǵan “Quqyq tártibin qamtamasyz etýge qosqan úlesi úshin” medali tabystaldy.
«Oqıǵa 6 naýryz kúni keshki ýaqytta oryn aldy. Kezekshilikke shyqqan kezimde №22 mektep dırektorynyń orynbasary Elmıra Ájibekqyzy maǵan habarlasty. Ol ekinshi synyp oqýshysynyń sabaqqa sebepsiz kelmegenin, ata-anasynyń baılanysqa shyqpaǵanyn aıtty. Mán-jaıdy bilý úshin biz balanyń úıine bardyq. Kórshi úıdiń qorshaýy arqyly kirdik. Terezeniń aldynda kishkentaı bala jatty. Dereý terezeni ashyp, ishtegi adamdardy syrtqa shyǵardyq. Gaz ben jaryqty sóndirdik. Azamattarǵa alǵashqy kómek kórsetip, keıin jedel járdem mamandaryna tapsyrdyq», – dedi Taraz qalasy PB 2-shi polısıa bóliminiń kámeletke tolmaǵandar isi jónindegi ýchaskelik polısıa ınspektory.
Tártip saqshysymen birge bolǵan tarazdyq №22 orta mektep dırektorynyń orynbasary Elmıra Eselbaeva da marapatqa ıe boldy. Ustazdy Jambyl oblysy polısıa departamentiniń basshysy quttyqtady.
Aıta ketý kerek, ajaldan aman qalǵan otbasy músheleriniń ómiri men densaýlyǵyna búginde eshqandaı qaýip joq. Úılesimdi jáne jedel is-qımyldardyń arqasynda qutqarylǵan januıanyń otaǵasy óz alǵysyn bildirdi.
«Kóretin jaryq sáýlesi bar eken» dep jatady ǵoı. Osy kisilerdiń arqasynda bir emes, bes birdeı adamnyń ómiri qutqaryldy», – dedi Baqytjan Baıtasov.