Sońǵy jyldary macha shaıy densaýlyqqa paıdaly sýper sýsyn retinde keńinen tanylyp keledi. Joǵary antıoksıdanttyq qasıeti men sergitetin áseri arqasynda bul shaı fıtnes áýesqoılary men durys tamaqtanýǵa mán beretinderdiń súıikti sýsynyna aınaldy. Alaıda dıetologtardyń pikirinshe, machanyń paıdasymen qatar, belgili bir adamdar úshin qaýip-qateri de bar.
Macha degenimiz ne?
Macha — japon shaıynyń erekshe túri. Ol kók shaı japyraqtarynyń untaqtalǵan túrinen daıyndalady. Kádimgi shaıdan aıyrmashylyǵy — machada japyraq túgeldeı tutynylady, bul onyń quramyndaǵy paıdaly zattardyń mólsherin edáýir arttyrady.
Machanyń paıdasy
Dıetolog Rımma Moısenkonyń aıtýynsha, deni saý adamdar úshin macha qaýipsiz, tipti paıdaly:
• Quramynda antıoksıdanttar, amınqyshqyldary jáne aqýyzdar mol;
• Zat almasýdy jaqsartady;
• Júıke júıesin sergitedi;
• Qan qysymyn turaqty deńgeıde ustaýǵa kómektesedi.
Kimderge qaýipti?
Machany keıbir adamdarǵa ishýge bolmaıdy. Ásirese:
• Gastrıt, dýodenıt, holesıstıt sıaqty asqazan-ishek aýrýlary bar adamdar;
• Qan qysymy turaqsyz, ıaǵnı gıpotonıa nemese gıpertonıa ustamalary bar adamdar;
• Ót qaby aýyratyndar.
Mamannyń aıtýynsha, machanyń quramyndaǵy kofeın qan qysymynyń kenet ózgerýine alyp kelýi múmkin. Sonymen qatar, ol óttiń jyldam bólinýin yntalandyryp, ishki aǵzalarda aýyrsynýdy kúsheıtedi. Mundaı reaksıa kútpegen gıpertonıalyq ustamamen aıaqtalýy yqtımal.
Macha — paıdaly sýsyn. Biraq kez kelgen ónim sekildi ony da jeke erekshelikterdi eskere otyryp tutyný kerek. Densaýlyǵyńyzǵa senimdi bolmasańyz, dárigermen keńesip baryp ishken jón. Paıda alamyn dep zıan shegip júrmeńiz.