Qala ákiminiń orynbasary Asqar Ámrın atalǵan qujattyń eki jaqty mindetterdi sheshetinin atap ótti: biregeı tarıhı kelbetti saqtaý jáne álemdik úrdisterge sáıkes keletin bolashaq megapolıstiń beınesin jasaý.
Búgin Almatyda VIII saılanǵan máslıhattyń kezekti XIII sesıasy ótti. Sesıa barysynda qabyldanǵan mańyzdy sheshimderdiń biri – depýtattardyń megapolıstiń dızaın-kodyn bekitýi, dep habarlaıdy almaty-akshamy.kz
«Dızaın-kodty ázirleý aıasynda halyqaralyq tájirıbeniń taldaýy júrgizilip, sarapshylarmen 15 jobalyq semınar uıymdastyryldy. Qala turǵyndarynyń 13 myńnan astam saýalnamasy jınalyp qarastyryldy. Respondentterdiń 40-50% astamy – qalamyzda týǵannan beri turyp kele jatqan almatylyqtar», - dedi Asqar Ámrın.
Almatynyń qalalyq keńistigine dızaın-kodty engizý aýqymdy talqylaýlar men qalalyq qoǵamdastyqtyń birlesken kúsh-jigeriniń nátıjesi boldy. Osyǵan deıin qurylys, sáýlet, ýrbanıstıka jáne jer qatynastary jónindegi jónindegi komısıanyń otyrysynda depýtattar jobaǵa ázirleýshimen talqylaýdan keıin engizilgen birqatar usynymdardy aıtqan. Atap aıtqanda, jańa dızaın-kod engizilgennen keıingi birinshi jyly azamattardan kelip túsken ótinishter sany kóp bolǵan jaǵdaıda túzetýler engizý múmkindigi qarastyryldy.
Qala ákimi Erbolat Dosaev qala turǵyndary men kásipkerleriniń qajettilikterine jaýap retinde dızaın-kodty kezeń-kezeńimen engizýdi tapsyrdy. Ótpeli kezeń jańa standarttarǵa ıkemdi beıimdelýdi qamtamasyz etedi. Jańa nysandar usynystardyń tolyq kólemin qoldaıdy, al burynnan bar nysandar úshin keshendi tásil qarastyrylǵan. Aqparat, resýrstar jáne tájirıbe almasýdyń ortalyǵyna aınalǵan dızaın-kodynyń saıt-servısi jasaldy. Bul alań dızaın-kodty engizý kezinde qoǵamdyq dıalog pen birlesip jumys isteýdiń mańyzdy quraly bolady.
Dızaın-kod – árqaısysy jeke baǵytty sıpattaıtyn qosymshalar jıyntyǵy. Mundaı qosymshalardyń altaýy boldy: aqparat tasyǵyshtary, navıgasıa, qalalyq jıhaz, kógaldandyrý, qasbetter men qorshaýlar. Almaty ákiminiń tapsyrmasy boıynsha qalalyq nysandardy jaryqtandyrý boıynsha jetinshi qosymsha qosyldy.
Máslıhat sesıasy barysynda depýtattar saılaý komısıalarynyń bes jyldy quraıtyn ókilettik merziminiń ótýine baılanysty Almaty qalasynyń saılaý komısıalarynyń jańa quramyn bekitti. Máselen, saılaý komısıalarynyń jańa quramyn qalyptastyrý eki aıdan keshiktirilmeı bastalady jáne 2024 jylǵy 9 qańtarda saılaý komısıalarynyń ókilettik merzimi aıaqtalǵanǵa deıin úsh kúnnen keshiktirilmeı toqtaıdy. Máslıhattyń jumys toby usynylǵan qujattardy muqıat qarap, úmitkerler boıynsha shekteýlerdiń bar-joǵyn tekserdi. Úmitkerlerdiń tájirıbesi, kásiptik bilimi men daǵdylaryn eskere otyryp, barlyǵy úsh saıası partıadan 1872 usynys jáne segiz qoǵamdyq birlestikten 2490 usynys tústi. Almaty qalasynyń aýmaqtyq saılaý komısıasynyń aqparaty boıynsha, saılaý komısıalary aýmaqtyq komısıalardyń 63 múshesinen jáne ýchaskelik komısıalardyń 4299 múshesinen turady.