Qyzdyń qupıa ólimi
Máskeýdiń Nıkýlın soty Tomırıs Baısafany óltirdi dep aıyptalǵan Murtazáli Medjıdovtyń isin qaıta qaraıdy, dep habarlaıdy Almaty-akshamy.kz Zakon.kz-ke silteme jasap.
RIA Novostı habarlaǵandaı, sot otyrysy 19 qańtarǵa josparlanǵan.
2021 jyldyń 7 maýsymynda alqabıler Medjıdovty kináli emes dep tanydy, biraq Máskeý qalalyq soty onyń kúshin joıyp, isti qaıta qaraýǵa jiberdi.
2018 jyldyń 13 sáýirinde qazaqstandyq Tomırıs Baısafa MMSHHQ-nyń tórtinshi qabatynyń terezesinen qulap ketti. Qyz Máskeýdegi ýnıversıettiń Halyqaralyq ekonomıkalyq qatynastar kafedrasynyń 4-kýrsynda oqyp júrgen. Dárigerler qyzǵa birneshe ota jasady, biraq úsh aptadan keıin ol aýrýhanada qaıtys boldy. Reseıdiń Tergeý komıteti «Ózin-ózi óltirý» baby boıynsha tergeýdi bastady. Keıinirek bul is «Kisi óltirý» baby boıynsha qaıta baǵalandy.
Eki jyldan keıin 2020 jyldyń 28 shildesinde bul iske qatysty Máskeýde Daǵystannyń burynǵy premer-mınıstriniń uly Murtazáli Medjıdov ustaldy. Tergeý málimetteri boıynsha, Medjıdov qyzdy uryp, terezeden ıterip jibergen.
Murtazáli Medjıdov tergeýdiń bastapqy kezeńinde suraq-jaýapqa alyndy. Tragedıa oryn alǵan kúni ony Tomırıspen bir aýdıtorıada bolǵanyn kórgender bar. Jigit pen qyzdyń ursysqany da aıtylady. Biraq oǵan qarsy dálelderdiń bolmaýyna baılanysty «Ózin-ózi óltirý» baby boıynsha qylmystyq is qozǵaldy.