Naqshbandıa tarıqatynyń basqa sopylyq mektepterden aıyrmashylyǵy – qoǵammen aralasýdy nasıhattap, ómirdiń rýhanı jáne dúnıaýı jaqtaryn biriktirýi. Naqshbandıa dástúrli sopylyq ádisterden erekshelenip, dúnıeden tolyq bas tartýdy emes, kerisinshe, ishki rýhanı tazarý arqyly Allaǵa jaqyndaýdy, al syrtqy ómirde qoǵammen tyǵyz baılanysta bolýdy ustanady.
Tarıqattyń negizgi urany – «Halyqtyń ishinde, biraq júregi – Allamen».
Biz Naqshbandıa tarıqatynyń qazirgi Qazaqstandaǵy jaǵdaıy men onyń qoǵamda alatyn orny týraly «Berbang» Qazaqstan kúrdteri asosıasıasy Basqarma keńesiniń tóraǵasy, Qazaqstan halqy Assambleıasy respýblıkalyq qorynyń tóraǵasy, Qazaqstan halqy Assambleıasy keńesiniń múshesi MIRZOEV Rafık Iakýbovıchtiń pikirin suraǵan edik.
Qazaqstandaǵy Naqshbandıa tarıqatynyń ókilderi, negizinen, eldiń ońtústik jáne ońtústik-shyǵys aımaqtarynda shoǵyrlanǵan. Bul aımaqtarǵa Túrkistan, Almaty, Shymkent jáne Jambyl oblystary jatady. Naqshbandıa tarıqaty qoǵamdy rýhanı tárbıeleýge jáne beıbitshilikke shaqyrady. Alaıda, tarıqattyń syrtqy saıası kúshter tarapynan manıpýlásıaǵa ushyraýy múmkin ekendigin eskere otyryp, onyń qyzmetin muqıat baqylaý jáne durys baǵytta damytý mańyzdy.
Osy jerde keıingi kezderi eldi adastyryp júrgen Qurbanáli Ahmetke qatysty qarama-qaıshy kózqaras qoǵamda keńinen talqylanyp júr. Qurbanáli Ahmet qajy – sopylyq dástúrdiń ókili retinde tanylǵan tulǵalardyń biri. Shákirtteri ony Naqshbandıa tarıqatynyń 36-nshy piri dep biledi. Onyń Quran sózderin burmalaǵany jáne óziniń rýhanı mártebesin asyra kórsetýi synı pikirlerge negiz bolýda. Qurbanáli Ahmet qajy keıbir áreketteri men ýaǵyzdarynda ıslamnyń bastapqy qaǵıdattaryna qaıshy keletin elementter bar. Aınalasyndaǵylar aıaǵyn súıip, oǵan erekshe qurmet kórsetýi musylman qaýymy arasynda úlken narazylyq týǵyzdy. Sol sıaqty, keıbir sopylyq aǵymdarda kezdesetin pirge erekshe qurmet kórsetý de shekten shyǵý bolyp sanalady. Qurbanáli Ahmet qajyǵa qatysty osyndaı jaıttar onyń sopylyq dástúrdiń negizgi qaǵıdalarynan aýytqyǵanyn kórsetedi. Sonymen qatar, bul jerde máseleniń bir ushy adamdardyń soqyr senimi men adasýshylyǵyna, dinı biliminiń tómendigine kelip tireledi.
Islamda Muhammed paıǵambardyń ózi de eshqashan aıaǵyn súıgizgen emes jáne ózin pir tutýǵa jol bermegen. Sondyqtan Qurbanáli Ahmet qajynyń izbasarlarynyń áreketteri ıslam dininiń negizgi qaǵıdattaryna qaıshy ekeni aıdan anyq.
Sol sebepti kúmándi dinı aǵymdardan aýlaq bolyp, suraqtar týyndaǵan jaǵdaıda tek resmı dinı birlestikterge júginýge keńes beremiz.