Mas kúıinde kólik tizgindep alǵash ret ustalǵan azamat birden 7 jylǵa júrgizýshi kýáliginen aıyrylady.
– Ákimshilik jazanyń jańa túri engiziledi. Ol – qamaq. Ony mindetti túrde qoldanady. Júrgizýshi mas kúıinde alǵash ret ustalsa da, 15 táýlikke qamalady. Jol apaty kezinde adamdardyń densaýlyǵyna zıan kelmese, biraq materıaldyq shyǵyn bolǵan jaǵdaıda, ákimshilik qamaqtyń merzimi 20 táýlikke uzartylady. Kólikti mas kúıde júrgizse, 7 jylǵa kýáliginen aıyrylady, – dedi İshki ister mınıstrligi ákimshilik polısıa komıtetiniń basqarma bastyǵy Asqar Tájenov.
Onyń aıtýynsha, júrgizýshi kýáliginen aıyrylǵan adam bir jyldyń ishinde rólge qaıta otyrsa, 20 táýlikke qamalyp, 8 jylǵa kólik júrgizý quqyǵynan aıyrylady.
Al mas kúıde kólikti qaıta tizgindegender 5 jylǵa deıin bas bostandyǵynan shektelip, júrgizýshi kýáliginen ómir boıyna aıyrylýy múmkin. Jol apatyna tússe 8 jylǵa, oqıǵa saldarynan kisi ólimi tirkelse 10 jylǵa deıin bas bostandyǵynan shekteledi. Medısınalyq tekseristen bas tartqan azamat 8 jylǵa júrgizýshi kýáliginen aıyrylady. Buryn bul merzim 3 jyl bolǵan eken. Taǵy 15 táýlikke qamalý qarastyrylǵan.