Memleket basshysynyń bıylǵy jyldy «Jumysshy mamandyqtary jyly» dep jarıalaýy – el damýynyń mańyzdy kezeńderiniń biri. Bul bastama qoǵamdaǵy jumysshy mamandyqtarynyń mártebesin arttyrýǵa, jastardy kásiptik bilimge yntalandyrýǵa jáne eńbek naryǵynyń suranysyna saı mamandardy daıarlaýǵa baǵyttalǵan.
Óndiristiń sıfrlyq dáýirge qadam basýy, jasandy ıntellekt pen avtomattandyrýdyń keń taralýy kásibı daǵdylardy únemi jetildirýdi talap etedi. Eger biz elimizdi álemdik tehnologıalyq kóshbasshylardyń qataryna qosýdy qalasaq, eń aldymen, joǵary bilikti tehnıkalyq mamandardy daıarlaýymyz kerek. Sondyqtan 2025 jyldyń «Jumysshy mamandyqtar jyly» bolyp jarıalanýy – ýaqyt talabyna saı qabyldanǵan strategıalyq sheshim.
Áleýmettik kózqarasty ózgertýdiń ýaqyty jetti. Qoǵamda «Joǵary bilim alý – tabysty bolashaqtyń kepili» degen birjaqty pikir qalyptasqan. Biraq shyn máninde, kásiptik-tehnıkalyq bilim alǵan mamandar elimizdiń ekonomıkalyq damýyna teńdeı úles qosady, al kóptegen salalarda olardyń róli tipti mańyzdyraq. Energetıka, qurylys, óndiris, kólik, aqparattyq tehnologıalar jáne basqa da salalar jumysshy mamandarsyz damymaıdy. Búginde sheteldik tájirıbe kórsetip otyrǵandaı, joǵary bilikti jumysshylardyń eńbekaqysy keıbir keńse qyzmetkerlerinen áldeqaıda joǵary bolýy múmkin. Bul qoǵamda jumysshy mamandyqtaryna degen kózqarasty túbegeıli ózgertý qajettigin dáleldeıdi.
Mańyzdy kezeń
«Almaty energetıka jáne elektrondy tehnologıalar koleji» – elimizdiń tehnıkalyq jáne kásiptik bilim berý júıesindegi aldyńǵy qatarly oqý oryndarynyń biri. Bizdiń basty mindetimiz – ónerkásiptik revolúsıa jaǵdaıynda básekege qabiletti mamandardy daıarlaý.
Kolejimizde bilim berý úrdisi eńbek naryǵynyń zamanaýı talaptaryna tolyq sáıkes keledi. Biz tek teorıalyq bilim berip qana qoımaı, stýdentterimizdi naqty óndiristik jaǵdaılarǵa daıyndaımyz. Osy maqsatta kásiporyndarmen seriktestikti keńeıtip, zamanaýı zerthanalar men óndiristik alańdarda tájirıbelik sabaqtar uıymdastyramyz.
Kolej energetıka, elektrondy tehnıka, avtomattandyrý, aqparattyq tehnologıalar jáne basqa da mańyzdy salalar boıynsha mamandar daıarlaıdy. Bizdiń túlekterimiz – Qazaqstan ekonomıkasynyń qozǵaýshy kúshi. Biz ónerkásiptiń ozyq kompanıalarymen tyǵyz baılanys ornatyp, stýdentterimizge zamanaýı jumys oryndarynda taǵylymdamadan ótý múmkindigin usynamyz.
Elimizdiń bolashaǵy – bilikti, tájirıbeli, eńbekqor mamandardyń qolynda. Biz jastardyń kásiptik-tehnıkalyq bilim alýyn yntalandyrý arqyly olardyń bolashaqta turaqty jumysqa ornalasýyna, laıyqty tabys tabýyna jáne óz mamandyǵy boıynsha damý múmkindigine ıe bolýyna jol ashamyz.
«Almaty energetıka jáne elektrondy tehnologıalar koleji» jastarǵa senimdi bolashaq syılaıtyn bilim ordasy retinde bul bastamany tolyqtaı qoldaıdy. Biz óz stýdentterimizdiń tek bilikti maman ǵana emes, el damýyna úles qosatyn kásibı sheberler bolyp qalyptasýyna bar kúshimizdi salamyz. 2025 jylǵy «Jumysshy mamandyqtary jyly» – kásiptik bilim berý júıesiniń jańa deńgeıge kóterilýine múmkindik beretin mańyzdy kezeń. Bul jyl tehnıkalyq jáne kásiptik bilim berý mekemeleri úshin úlken jaýapkershilikti talap etedi. Biz bul ózgeristerdiń aldyńǵy qatarynda bolýǵa daıynbyz.