Qazaqstanda komýnaldyq tólemder men nesıeler boıynsha bereshek mura bolyp sanalady.
Eger adam murany qabyldaıtyn bolsa, onda notarıýs arqyly qaıtys bolǵan mura qaldyrýshynyń qaryzy týraly anyqtap alýy kerek, dep habarlaıdy Almaty-akshamy.kz
Qaıtys bolǵan adamnyń murageri týysynyń nesıesin alýdan bas tartýǵa quqyly. Mundaıda ol muranyń qalǵan bóliginen (bar bolsa) bas tartýy tıis. Sebebi muranyń bir bóliginen bas tartýǵa, eskertýlermen nemese shartpen muradan bas tartýǵa zań boıynsha jol berilmeıdi. Qarapaıym tilmen túsindiretin bolsaq, páterdi muraǵa alyp, biraq onyń burynǵy ıesiniń qaryzyn tóleýden bas tartýǵa bolmaıdy.
Eger adam muragerlikten bas tartsa, bul jaǵdaıda ol óz quqyqtary týraly málimdemeýine bolady.
"Sonymen qatar ol mura qaldyrýshynyń múlkin paıdalaný, komýnaldyq qyzmetterge aqy tóleý, jóndeý jumystaryn júrgizý sekildi áreketti jasamaýy tıis. Bilmestikten muraǵa kirý týraly ótinish berip, keıin oıyn ózgertip jatsa, onda tıisti muraǵa quqyq týraly kýálik alǵanǵa deıin notarıýsqa muradan bas tartý týraly ótinish berýi tıis. Al kýálikti alǵatyn bolsa, onda muradan tek sot arqyly bas tartýǵa bolady", - dep habarlady agenttik.
Eger adam murany qabyldaıtyn bolsa, onda notarıýs arqyly qaıtys bolǵan mura qaldyrýshynyń qaryzy týraly anyqtap alýy kerek.
Agenttiktiń dereginshe, murager osy aqparatty bilgennen keıin nesıe berýshilerge adamnyń qaıtys bolýy týraly kýálikti usynyp, aıyppuldardy eseptemeýdi jáne ol muragerlik quqyǵyna engenge deıin qaryzdy toqtata turýdy talap etkeni jón.
Eger nesıe berýshi mura qaldyrýshy qaıtys bolǵan soń ósimpuldy eseptese, onda murager bereshekti qaıta esepteýdi talap ete alady.
"Murany qabyldaǵan adam qaıtys bolǵan týysynyń nesıesin qaryz shartynda jazylǵan keste boıynsha óteıtin bolady. Eger bereshekti óteý kestesi oǵan yńǵaısyz bolsa nemese qaryzdy merziminen buryn japqysy kelse, munyń bárin nesıe berýshimen sheship alýy tıis", - delingen habarlamada.
Eger mura qaldyrýshy merzimi ótip ketken bolsa jáne odan bereshekti óndirip alý týraly zańdy kúshine engen sot sheshimi bolsa, onda murager de bul máseleni kredıtormen jeke retteýi qajet.
Murany paıdalanbas buryn múliktiń naryqtyq qunyn baǵalaǵan jón. Bul qaryzdyń alynǵan muraǵa sáıkestigin anyqtaýǵa, memlekettik bajdy esepteýge qajet bolady.
Eger qaıtys bolǵan adamnyń muragerleri bolmasa nemese olar murany paıdalanýdan bas tartsa, onda ol ıesiz múlik dep tanylady jáne ol komýnaldyq menshikke ótedi.