Mınıstr sportshylardy daıyndaý úshin maman tartýdy tapsyrdy.
Memleket basshysynyń tapsyrmasy boıynsha Týrızm jáne sport mınıstrligi Azıa oıyndarynyń qorytyndysy boıynsha federasıalardyń esebin tyńdady, dep habarlaıdy Almaty-akshamy.kz
Bul joly eskek esý, jeńil atletıka jáne sadaq atý federasıalarynyń basshylyǵy baıandama jasady. Sport fýnksıonerleri quramanyń Azıa oıyndaryndaǵy jarystarǵa toqtalyp, qalyptasqan jaǵdaı týraly baıandady.
Hanchjoýdaǵy Azıa oıyndarynda akademıalyq eskek esý boıynsha Qazaqstan quramasy júldegerler qatarynan kórine almasa da, baıdarka men kanoede eskek esý boıynsha 1 altyn, 4 kúmis jáne 3 qola júldeni jeńip aldy.
Týrızm jáne sport mınıstri Ermek Marjyqpaev akademıalyq eskek esý boıynsha ulttyq quramanyń Azıadadaǵy nátıjesine kóńili tomaıtynyn jetkizdi. Óıtkeni, Azıa oıyndarynyń qarsańynda eskek esýshilerge zor senim artylyp, el qorjynyna altyn júlde salady dep kútilgen edi. Sondaı-aq, mınıstr sportshylardyń fýnksıonaldyq jáne dene daıarlyǵy álsiz ekenin aıtyp, quramanyń ishki tártibin saqtamaǵandarǵa eskertý jasady.
Ekinshi bolyp jeńil atletıka federasıasynyń ókilderi baıandama jasady. Bıylǵy Azıa oıyndarynda jeńil atletter tórt qola júldege ıe bolyp, jalpykomandalyq esepte 16-orynǵa turaqtady. Osydan 4 jyl buryn Indonezıanyń Jakarta qalasynda ótken sary qurlyq dodasynda otandastarymyz 8-orynnan kóringen edi.
Parıjdegi tórt jyldyqtyń basty dodasyna nebári 8 aı qaldy. Qazirgi tańda bizge naqty jospar men yntymaqtastyqta jumys isteý qajet. Federasıalarǵa ulttyq quramanyń rezervin qalyptastyrý jóninde jumysty kúsheıtýdi tapsyramyn. Bas jattyqtyrýshylarmen birlesip Parıj Olımpıadasyna deıin komanda kóshbasshylaryn jeke daıarlaýdyń josparyn daıyndaý kerek, – dep atap ótti vedomstvo basshysy.
Jeńil atletterden keıin sadaq atý ókilderi esep berdi. Federasıa basshylyǵy ózderine alǵan mindettemelerine qaramastan, mergenderimiz birde-bir baǵdarlama boıynsha júldeli oryndardan kórine alǵan joq.
Jıyn qorytyndysynda mınıstr sadaq atý federasıasynyń Azıadadaǵy jarysyna qanaǵattanarlyqsyz degen baǵa berdi. Eskek esý jáne sadaq atý sporty boıynsha Azıadada júldeli oryndarǵa ıe bolý jospary oryndalǵan joq. Al jeńil atletterdiń nátıjelerin áli de jaqstartý qajet. Ermek Marjyqpaev ótken jarystardyń nátıjelerine tereń taldaý júrgizýdi jáne sportshylardy aldaǵy Parıj Olımpıadasyna tyńǵylyqty daıyndaý úshin mamandardy tartý máselesin pysyqtaýdy tapsyrdy.