Áıgili Maral ıshannyń Kenesary hanǵa syılaǵan Qurany tabyldy.
Bul oqıǵa Qazaqstannyń jańa dáýiriniń berekeli bastaýy bolsyn dep tileıik, dedi Prezıdent. Memleket basshysy Kenesary hannyń qolynda bolǵan Quran kitabynyń elge kelýin jaqsy yrymǵa balady.
Bul jaıynda Túrkistanda ótken Ulttyq quryltaıdyń «Ádiletti Qazaqstan – Adal azamat» atty ekinshi otyrysynda Prezıdent Qasym-Jomart Toqaev aıtty, dep habarlaıdy Almaty-akshamy.kz.
«Jıynnyń sońynda eldiń rýhyn kóteretin taǵy bir jaqsy jańalyqty sizdermen bóliskim keledi. Áıgili Maral ıshannyń Kenesary hanǵa syılaǵan Qurany tabyldy. Bul – elimizdiń rýhanı ómirindegi eleýli oqıǵa. Maral ıshan barsha qazaqqa tanymal adam bolǵan. Ol – tól tarıhymyzda erekshe orny bar Kenesary hannyń úzeńgiles serigi. Bul Quran eki ǵasyr boıy qoldan qolǵa ótip, aqyry shetelge shyǵarylǵan eken. Ony janashyr azamattardyń, mesenattardyń kómegimen Qazaqstanǵa qaıtaryp aldyq. Quranda Maral ıshannyń jáne Kenesary hannyń móri bar. Jádigerge jan-jaqty saraptama jasaldy. Otandyq jáne sheteldik ǵalymdar Qurandy muqıat zerttedi. Qurannyń, rasynda, Maral ıshanǵa tıesili bolǵany jáne Kenesary hanǵa berilgeni anyqtaldy. Kez kelgen órkenıetti el óziniń tarıhı muralaryna zor qurmetpen qaraıdy. Ony qasterlep, murajaıǵa nemese basqa da arnaıy oryndarǵa qoıady. Biz de babalardan mıras bolǵan árbir jádigerdi qadirlep, saqtaı bilýimiz kerek», - dedi Prezıdent.