Jınalǵan qarajat marqumnyń otbasyna tabys etildi
Almatyda BAQ ókilderi arasynda ómirden erte ótken belgili jýrnalıs Maqsat Slámbekovti eske alýǵa arnalǵan shaǵyn fýtboldan týrnır ótti. Ekinshi jyl qatarynan uıymdastyrylyp otyrǵan ala dop básekesiniń aýqymy keńeıip, respýblıkalyq deńgeıde nasıhattaldy. Jarysta Qyzylorda, Shymkent, Taldyqorǵan jáne jergilikti BAQ ókilderinen barlyǵy 10 komanda tóbe kórsetip, arda azamatty eske aldy. Týrnır «Almaty» telearnasynyń 25 jyldyǵy aıasynda ótkizildi, dep habarlaıdy almaty-akshamy.kz.
Tanymal jýrnalıs Maqsat Slámbekov – búkil sanaly ǵumyryn televızıa salasyna arnaǵan jan. Eńbek jolyn «Almaty» telearnasynan bastady. On jyldan asa eńbek etip, «Tarıh tarazysy», «Qyl kópir», «Jekpe-jek», «Emshiler», «Kásip kózi» sekildi baǵdarlamalardy kórermen nazaryna usynyp, telearnada redaktor, prodúser, menedjer qyzmetterin atqardy. Telearnanyń damýyna eleýli úles qosyp, kórermen kóńilinen erekshe oryn alǵan áriptesti eske alý is-sharasyna Maqsat Slámbekovtiń anasy kelip, ulynyń áriptesterine alǵys aıtty. Jınalǵan komandalarǵa sáttilik tiledi.
– Balama jaqsy tárbıe berdim dep oılaımyn. Ósirdim. Jetkizdim. Búgin týrnırge 10 komanda qatysyp jatyr, bolashaqta is-sharanyń aýqymy keńeıe bersin, – dedi M. Slámbekovtyń anasy Úmitjan Slámbekova.
Jasyl alańda jasyndaı jarqyldaǵan Maqsat Slámbekovty áriptesteri úzdik qaqpashy retinde jaqsy tanıdy. Qazaq jýrnalısin «Bartez» dep te atap ketkeni beker emes. Óıtkeni onyń alańdaǵy sheberligi bir bólek, naǵyz kapıtanǵa saı bolmysy da komandasyna senimdilik uıalatatyn.
– Bıyl – erekshe jyl. Sebebi «Almaty» telearnasyna 25 jyl toldy. Osyǵan oraı, BAQ ókilderi arasynda áriptesimiz Maqsat Slámbekovty eske alýǵa arnalǵan týrnır uıymdastyryp jatyrmyz. Mereıtoı aıasynda 50-ge jýyq is-shara ótkizýdi josparlap otyrmyz, – dedi «Almaty» telearnasynyń bas prodúseri Ralıda Muqanova.
Áriptester arasyndaǵy dostyq týrnırinde komandalar 2 topqa bólinip, myqtyny anyqtady. Baby men baǵy qatar shapqan Taldyqorǵandyq «Qareket» quramasy júldeli birinshi oryndy ıelense, «Ońtústik» komandasy ekinshi jáne «Sport+ QAZAQSTAN» arnasy úshinshi oryndy qanaǵat tutty. Sondaı-aq úzdik qaqpashy, shabýylshy nomınasıalary boıynsha da syılyq tartý etildi.
– Maqsat aǵa – óte daryndy qaqpashy, bilikti maman. Jasyl alańda birge oınadyq. Búgin chempıon bolyp jatyrmyz. Meniń ǵana eńbegim emes, komandama alǵys bildiremin, – dedi «Qareket» komandasynyń kapıtany Samat Esentaıuly.
Týrnır qaıyrymdylyq sıpatta boldy. Jınalǵan qarajat marqumnyń otbasyna tabys etildi. Jarys sońynda jınalǵandar arda azamat jaıynda estelik aıtyp, uıymdastyrýshylarǵa alǵys bildirdi.