Tasqyn qaýpi kórshiles eldi de aınalyp ótpedi. Ótken demalys kúnderi tolassyz jańbyr saldarynan Ózbekstannyń Samarqan jáne Qashqadarıa oblystarynda sel júrdi. Ásirese, týrıser kóp baratyn shahar Samarqanda ortalyq kósheler sý astynda qaldy. Saldarynan kólik qatynasy qıyndaǵan. Jańbyr sýy jeke úılerdiń aýlasy men birneshe kópqabatty úıdiń jertólesine de kirgen. Taǵy birneshe aımaqta sý tasqyny bolý qaýpi saqtalyp otyr. Bul týraly «Ýzgıdromet» mekemesiniń basshysy shuǵyl habarlama jasady. Sel júrýi múmkin aýmaqtar qatarynda Naýaıy, Jyzaq, Surhandarıa, Namangan, Ferǵana men Ándijan oblystary bar.
Ǵaırat Jýraev, Tótenshe jaǵdaılar mınıstrliginiń departament bastyǵy:
Taýly aımaqtarda tasqynnyń aldyn alý maqsatynda 120 baqylaý beketi qurylyp, táýlik boıy qyzmet kórsetýge kiristi. Eldegi 48 sý qoımasy men 11 iri gıdrotehnıkalyq nysandardyń tótenshe jaǵdaılarǵa daıyndyǵy pysyqtalyp jatyr.