Almaty qalasyndaǵy «Ustazdar úıine» «Órleý» BAUO» AQ Basqarma tóraǵasy Ásel Muhametjanova bastaǵan ortalyq qyzmetkerleri zamanaýı talap deńgeıinde muǵalimderdiń kásibı biliktiligin arttyrý barysyndaǵy ózekti máselelerdiń túıindi sheshimderin birlesip qarastyrý maqsatynda arnaıy issaparmen keldi.
Kafedranyń profesorlyq-oqytýshy quramymen kezdesýde Ásel Zeınýlaqyzy Ulttyq ortalyqtyń qyzmet kórsetý aıasyn keńeıtý maqsatynda jasalǵan birqatar jumystarǵa toqtalyp, keleshekte atqarylatyn mindetterge baǵdar jasady. Instıtýttyń aǵa oqytýshylary men trenerleriniń kýrs sapasyn arttyrýǵa qatysty mańyzdy usynystarymen tanysyp, oı-pikirimen bólisti.
Qyzmet babyndaǵy júzdesý Almaty qalalyq bilim basqarmasynda jalǵasty. Kezdesý barysynda biliktilikti arttyrý kýrstaryn júıeli, sapaly ótkizýdiń tıimdi joldary qarastyryldy. Mektep pen «Órleýdiń» arasyndaǵy áriptestik, iskerlik baılanystar zerdelendi. Bir maqsat, bir múdde – oqýshyǵa sanaly tárbıe, sapaly bilim berýdi kózdeıtin basshylar muǵalimderge qoldaý kórsetý aıasynda eksperımenttik zertteý alańdarynyń, tirek mektepteriniń jumysyn jandandyrýdyń ózektiligin talqylady.
Basqarma basshysy Ásel Zeınýlaqyzy kýrstarda muǵalimderdiń bilim alý men kásibı daǵdysyn qalyptastyrýǵa júıeli jumystardyń josparlanyp otyrǵanyn, Bilim jáne ǵylym mınıstriniń tikeleı tapsyrmasy boıynsha «Órleý» tamyz aıynda «Pedagogterdiń sıfrlyq quzyrettiligin damytý» kýrsyn bastaıtyndyǵyn jetkizdi. Bul kýrs demalysta bolǵan muǵalimderdiń aqparattyq-kommýnıkasıalyq biliktiligin arttyryp, jańa oqý jylyna daıyndyǵyn eseleı túspek.