Olardyń maqsaty jalǵyzbasty anaǵa baspana alyp berý
Aqtaýdan qaıyrymdylyq jasaý úshin jaıaý jolǵa shyqqan mańǵystaýlyq eki azamat Almatyǵa aman-esen jetti, dep habarlaıdy Almaty-akshamy.kz BAQ.KZ-ke silteme jasap.
Erikti Jalǵas Sádýovtyń aıtýynsha, jolda eshqandaı qıyndyq bolmaǵan. Tek qasyndaǵy joldasy aýyryp qalǵan. Dese de uzaq joldy eńserip, 39 kúnde Almatyǵa jetken.
-Aqtaýdan doppen shyqqan edik. Dopty Atyraý qalasynda qol sómke men saǵatqa almastyrdyq. Oral qalasynan saqınaǵa aýystyrdyq. Aqtóbe qalasynda polısıa qyzmetkerleri saqına almaı, qaıta qolymyzǵa saǵat ustatty. Sonymen saqına men saǵat qolymyzda boldy. Aralǵa kelgende taǵy bir turǵyn saqına berdi. Odan bólek esepshotqa aqsha jınaldy. Al Almatyǵa kelgende qymbat qulaqqapqa araldyq turǵynnyń bergen saqınasyn aýystyryp aldyq, - dedi Jalǵas Sádýov.
Osylaısha jaıaý jolaýshylardyń alǵa qoıǵan maqsaty oıdaǵydaı oryndaldy. Qazirgi tańda esepshotqa 4 mıllıon teńgeden astam qarjy jınalǵan. Sonymen qatar qolda saqına, saǵat, qulaqqap bar. Endi qaıyrymdy jolaýshylar jaıaý Taldyqorǵan qalasyna bet almaq.
-Taldyqorǵanǵa baryp kelgennen keıin aýksıon ótkizemiz. Sol arqyly jınalǵan zattardy satyp, qarjyny biriktirip, baspana alamyz, - dedi Jalǵas Sádýov.
Aıta keteıik, mańǵystaýlyq eriktiler Jalǵas pen Jeńis 1 sáýir kúni Almatyǵa jaıaý jolǵa shyqqan bolatyn. Negizgi maqsaty – eki balasy epılepsıamen aýyratyn jalǵyzbasty anaǵa baspana alyp berý.